„Доказ дека над 92 отсто од работите на патот беа завршени уште во мај 2024 година се фотографиите што го објавувам. А денеска патот се пушта во сообраќај“, вели пратеникот и поранешен министер за транспорт
Експресниот пат Градско – Дреново во должина од 15,5 километри до мај 2024 година се градеше од владата на Социјалдемократскиот сојуз (СДСМ), а над 92 отсто од работите веќе беа завршени. Ова на својот фејсбук-профил го напиша поранешниот министер за транспорт и актуелен пратеник на СДСМ, Благој Бочварски, откако денеска оваа делница ја пуштија во употреба евроамбасадорот Микалис Рокас, премиерот Христијан Мицкоски, министерот за транспорт Александар Николоски и директорот на Јавното претпријатие за државни патишта (ЈПДП), Коце Трајановски.
„Доказ дека над 92 отсто од работите на патот беа завршени уште во мај 2024 година се фотографиите што го објавувам. А денеска патот се пушта во сообраќај“,
вели тој.
Според него, овој пат е визијата на СДСМ за изградба на патна инфраструктура кој го промовира во 2017 година наместо, како што рече, барокни фасади или фонтани.
„Без разлика дали една или друга влада ќе реализира неколку проценти од кој било важен инфраструктурен проект, важно е добрите проекти да продолжат, не поради партиите, туку поради граѓаните“,
пишува Бочварски.
И пратеникот на СДСМ, Миле Талески, денеска рече дека пуштањето во употреба на експресниот пат Градско -Дреново е потврда за вистинските политики на СДСМ.
Посочи дека проектот во време на СДСМ бил реализиран со над 92 отсто и опфаќал изградба на трите клучки кај Градско, Росоман и Дреново, четири вијадукти, мостови, натпатници и потпатници и поставување на 98 отсто од асфалтот.
„Актуелната власт се кити со туѓо перје завршувајќи само 50 метри асфалт пред пуштањето во употреба. Но, важно е што граѓаните конечно добиваат целосно функционален пат што ги задоволува највисоките европски стандарди“,
вели Талески.
Очекува дека наскоро ќе биде завршена и делницата од Дреново до Фариш, за која рече дека веќе е над 80 отсто завршена во време на владата на СДСМ.