Ние сметаме дека јазичниот, историскиот и културниот идентитет не е прашање за дискусија и не е прашање за политичко договарање, изјави Арбер Адеми, по средба со Антонио Милошоски
Потребно е усогласување на текстот на резолуцијата меѓу сите парламентарни партии за да се осигураат дека тоа не му наштетува на нашето чекорење кон ЕУ, изјави денеска координаторот на пратеничката група на ДУИ Арбер Адеми, по средбата на пратеници од оваа партија со колеги од ВМРО-ДПМНЕ за поддршка на резолуцијата што ја поднесе опозициската партија за спорот со Бугарија.
„Не треба да правиме нешто што ќе биде спротивно на ЕУ -интеграцијата. ДУИ смета дека јазичниот, историскиот и културниот идентитет не е прашање за дискусија и не е прашање за политичко договарање. Следствено цениме дека е потребно усогласување на текстот на резолуцијата помеѓу сите парламентарни партии и да се осигураме дека тоа не му наштетува на нашето чекорење кон ЕУ“,
рече Адеми, по средбата со пратеникот Антонио Милошоски од ВМРО-ДПМНЕ.
Наспроти воздржаноста на ДУИ за резолуцијата, за која ВМРО-ДПМНЕ тврдеше дека се базира на „Македонскиот манифест на МАНУ, УКИМ и МПЦ-ОА, од СДСМ вчера соопштија дека ја прифаќаат иницијативата на опозициската партија., единствено со забелешка дека таа треба да биде усогласена со Уставот, наместо да се користи старото уставно име на државата.
Дека има разминување во позициите меѓу владејачките партии во однос на резолуцијата што ја покрена ВМРО-ДПМНЕ посочи денеска и Халил Снопче, од коалицијата Алијанса на Албанците и Алтернатива.
„Има еден проблем. Имавме изјава на министерот за надворешни работи Бујар Османи дека оваа резолуција им штети на меѓународните тенденции на земјата, но исто така имавме и изјава на пратеникот од СДСМ Костадинов дека оваа резолуција е добра. Логично би било партиите на власта да имаат заеднички став“,
рече Снопче.
По денешната средба со пратеници на ВМРО-ДПМНЕ, Снопче изјави дека ги слушнал образложенијата на неговите собраниски колеги и оти останува тоа да го пренесе во партијата.
„За нас е важно Македонија да продолжи со интегративните процеси. Нашата Влада и целокупното општество во државата да продолжи со залагањата за интеграција во ЕУ. Тоа е главна цел за државата. Владата да биде внимателна и во разговорите и во реформите. За нас се многу битни добрите односи во регионот, па следствено на тоа и со Бугарија. Препорачуваме Владата да биде внимателна“,
изјави Снопче.
ВМРО-ДПМНЕ предложи резолуција за евроинтеграцискиот пат на државата, која што се уште е во дрфат верзија, а во изминатите два дена лобираше во парламентарните партии таа да биде прифатена. Начелна поддршка доби од македонските партии од власта СДСМ, ДОМ, ЛДП и ДС.