„Цениме дека разумно и рационално ќе пристапуваат сите политички партии. Кога ќе се отвори Уставот, треба да дадеме одговор и за начинот на избор на претседател во Собрание, а тоа е најдобро да се реализира според визијата на Али Ахмети“, вели Адеми
Адеми побара од ВМРО ДПМНЕ да се произнесе против Русија, за Европа како и да се огради од, како што рече, поетичните про-путинистички ставови на нивната веќе еднаш поразена русо-носталгична кандидатка Гордана Давкова
Демократската унија за интеграција (ДУИ) очекува сите политички партии позитивно да одговараат на нивната идеја претседателот на државата да се бира во Собранието.
Потпретседателот и портпарол на Демократската унија за интеграција, Арбер Адеми вели дека ако се пристапи рационално кон ова прашање разумно е сите политички партии да се согласат со ова.
„Ако пристапиме рационално кон ова прашање, имајќи ги предвид сите ризици и тешкотии за реализирање на успешен претседателски изборен циклус, разумно сите политички партии би требало да се согласат со ова – да биде избран претседателот во Собрание и тоа не би било никаква уцена и пречка во реализирање и на тоа што следи како обврска во нашиот евро-интегративен пат. Цениме дека разумно и рационално ќе пристапуваат сите политички партии. Кога ќе се отвори Уставот, треба да дадеме одговор и за начинот на избор на претседател во Собрание, а тоа е најдобро да се реализира според визијата на Али Ахмети“,
рече Адеми на денешната прес-конференција.
Според него, примерот за избор на претседател во Собранието е пракса што ја имаат и други држави посочувајќи ги како примери Албанија и Косово, иако, како што рече, претседателот во овие земји има поголеми надлежности.
„Имајќи предвид дека личноста на претседателот треба да биде обединувачка и кај нас како хетерогено општество, цениме дека со двотретинско мнозинство и Бадентерово мнозинство, ќе се обезбеди тоа обединување што треба да го отсликува претседателот на државата, а граѓаните ќе бидат поштедени од милионските буџетски средства што ќе се потрошат за претседателските избори“,
рече Адеми.
Адеми рече дека со изборот на претседател во Собранието ќе се заштедат над 20 милиони евра во државата, а десетици илјади граѓани ќе се поштедат од процесот на собирање потписи, додека сите граѓани ќе бидат поштедени од кампањата и учеството на изборите за функција која има протоколарен карактер.
Партискиот потпретседател уште една повтори дека Али Ахмети уште во 2009 година на вториот изборен Конгрес на ДУИ во Скопје ги наброил 12 позиции, за кои како што рече Адеми, тогаш биле недостижни за Албанците, меѓу кои и претседател на државата.
„Од тогаш, оваа прогресивна идеја ја имаме во изборната програма од 2014, 2016 и 2020 година и ја реализираме чекор по чекор. Разочарани сме што ВМРО-ДПМНЕ, еднаквоста ја гледа како уцена, и избрзува, како и секогаш, со отфрлање на прогресивни идеи поради заробеноста на конзервативниот ум во замислената етничка доминација во заедничката држава. Затоа, Албанците, Македонците и сите други граѓани треба масовно да ја дадат својата недвосмислена поддршка за кандидатот Бујар Османи“,
додаде тој.
Според Адеми, потребни се сите гласови за да се овозможи измена на Уставот, истовремено и за претседателот и за уставните амандмани кои произлегуваат од Договорот за добрососедство.
„Ова е вин-вин шанса и за ВМРО-ДПМНЕ и за СДСМ, и за сите граѓани, и ова ќе биде ставот на ДУИ и за вториот изборен круг на претседателските избори и за парламентарните избори. Само со концентриран глас за најсилната албанска партија ќе се постигне целта и ќе се спречи Русија и руското влијание кое ја зафати нашата економија, критичната инфраструктура, политичките партии, медиумите, верските заедници, граѓанското општество и има за цел да го дестабилизира нашето кревко мултиетничко, мулти-религиозно и мултикултурно општество за промовирање на домино ефект низ целиот регион“,
рече Адеми.
Тој, на прес-конференцијата побара од ВМРО ДПМНЕ да се произнесе против Русија, за Европа како и да се огради од, како што рече, поетичните про-путинистички ставови на нивната веќе еднаш поразена русо-носталгична кандидатка Гордана Давкова.
Во однос на собирањето потписи за нивниот претседателски кандидат Бујар Османи, Адеми соопшти дека до вчера попладне биле собрани околу четири илјади потписи.