Отворање на Уставот за измени со кои ќе се овозможи избор на претседателот на државата во парламентот, но и за уставните амандмани кои произлегуваат од Договорот за добрососедство со Бугарија, како што посочи Адеми, ќе биде ставот на неговата партија и за вториот круг од претседателските и за парламентарните избори
Идејата претседателот на државата да се избира во Собранието е на Али Ахмети, а тоа што со истата платформа еден ден претходно излезе и претседателскиот кандидат на опозициските партии на Албанците, Арбен Таравари, е затоа што успеале да го обезбедат вчерашниот говор на лидерот на ДУИ.
Ова денеска го изјави потпретседателот и координаторот на пратеничката група на ДУИ во Собранието, Арбер Адеми, на прес-конференција пред претседателската резиденција на Водно.
„Сржта на идејата на лидерот Али Ахмети е изборот на претседателот на државата во Собранието со двотретинско мнозинство на гласови и со Бадентер за да се обезбеди општествен натпартиски консензус за да се овозможи со над 80 гласа во Собранието и со етнички консензус да се спречи етничкото надгласување и наметнување само од двете поголеми македонски политички партии“,
рече Адеми.
Оваа идеја, како што посочи, од страната на Таравари успеале да ја прочитаат, но не и да ја разберат.
„Токму оваа идеја дериватите на ДУИ предводени од веќе разрешениот претседател на Алијанса за Албанците (Арбен Таравари н.з.) не ја разбрале кога претходно го прочитале, значи еден ден претходно, говорот на Али Ахмети бидејќи успеале да го обезбедат предвреме вчерашниот говор на нашиот претседател“,
кажа Адеми.
Говорејќи во таа насока, тој рече дека идејата Ахмети веќе ја претставил на вториот конгрес на Демократската унија за интеграција уште во 2009 година во Скопје, кога, како што кажа, ги набројал дванаесетте позиции дотогаш недостижни за Албанците, а партијата ја имала и во изборната програма во 2014, 2016 и 2020 година.
Според Адеми, со тоа што „дериватите на ДУИ“ читаат и не разбираат ѝ прават голема услуга на партијата паѓајќи во нивната стапица со присвојувањето на нивната идеја.
„Ова многу добро го разбираат од ВМРО-ДПМНЕ и од СДСМ, а уште подобро го разбираат Албанците и граѓаните на Република Северна Македонија. Затоа бараме апсолутна масовна поддршка на Албанците и на другите граѓани за кандидатот д-р Бујар Османи“,
кажа координаторот на пратеничката група на ДУИ.
Инаку, тој на прес-конференцијата пред претседателската резиденција на Водно информираше дека ДУИ, како што најави нејзиниот лидер Али Ахмети вчера, започнала со собирање потписи за кандидатурата на актуелниот министер за надворешни работи на земјава Бујар Османи за претседател на државата.
„После првиот премиер Албанец, после првиот вицепремиер, министерот за надворешни работи, тој за одбрана и за внатрешни работи, државните правобранители и народниот правобранител, претседателите на Уставниот, Врховниот и на Управниот суд, претседателите на фудбалската, боречката и боксерската федерација, дојде време да го отвориме патот и претседателот на државата да биде Албанец“,
рече Адеми.
Тој на прес-конференцијата во добар дел се наврати на поентите од вчерашното обраќање на партискиот лидер од седиштето на ДУИ во Мала Речица со кое го објави претседателскиот кандидат и ја најави предизборната платформа на ДУИ.
Отворање на Уставот за измени со кои ќе се овозможи избор на претседателот на државата во Парламентот, но и за уставните амандмани кои произлегуваат од Договорот за добрососедство со Бугарија, како што посочи Адеми ќе биде ставот на нивната партија и за вториот круг од претседателските и за парламентарните избори.
„И ние тоа ќе го постигнеме. Само гласајќи за најсилната партија на Албанците ќе се постигне целта и ќе се спречи Русија и руското влијание кое ја зафати нашата економија, критичната инфраструктура, политичките партии, медиумите, верските заедници, граѓанското општество и има за цел да го дестабилизира нашето кревко мултиетничко, мултирелигиозно и мултикултурно општество за промовирање на домино ефект низ целиот регион“,
рече Адеми.
Прашан дали ДУИ ќе го бојкотира вториот круг од претседателските избори доколку нивниот кандидат не помине во првиот, пратеникот изјави дека во моментов тие се фокусирани на обезбедување на што поголема поддршка од сите граѓани, додавајќи дека бојкотот не е соодветно средство.
„Значи ние целосно сме фокусирани на обезбедување на што поголема поддршка од сите граѓани. Од денеска можете да видите и по социјални мрежи во сите градови на Република Северна Македонија се потпишуваат толпа на граѓани за кандидатурата на Бујар Османи. Ние сме максимално фокусирани да извојуваме победа, а истовремено таа победа ќе биде легитимирање на нашето барање во иднина веднаш после изборите – парламентарни и претседателски да се отвори Уставот да се направат измени во делот на изборот на претседател и секако да се направат измени од тоа што произлегува од Договорот со Бугарија, а бојкотот не е соодветно средство“,
кажа Адеми.
Во овој контекст, тој беше прашан и дали нивниот претседателски кандидат Бујар Османи ќе отиде во Источна Македонија да ја претстави својата програма и да побара поддршка, на што одговори:
„Секако. Кандидатот д-р Бујар Османи во моментов е во Обединетите нации претставувајќи ја државата, претставувајќи ги сите граѓани без оглед на нивниот етнички, културен, социјален и образовен бекграунд. Така што и како претседател на државата ќе ја бараме поддршката на Албанците и на сите граѓани и секако дека ќе имаме контакти и комуникација со сите граѓани“,
подвлече пратеникот на ДУИ.
Од денеска до 8 март тече рокот за собирање на за кандидати за претседател и за кандидати за пратеници. Кога подносител на листа на кандидат за претседател е група избирачи, потребно е да се соберат најмалку 10.000 потписи од запишаните избирачи во Избирачкиот список, додека кога подносител на листа на кандидат за претседател се пратеници, потребно е да се соберат најмалку 30 потписи од пратениците.