Четири медицински лица од приватната болница „Ремедика“ се во самоизолација кои учествувале во породувањето на жената која пред три дена се породила во оваа болница, а за која е утврдено дека е позитивна на коронавирус, соопшти директорката на Државниот санитарен и здравствен инспекторат Иринка Бухова-Сотирова.
Се работи за родилката која претходно на 6 овој месец била примена и на Клиниката за гинекологија и акушерство и каде што не открила дека имала контакт со лице кое е позитивно на ковид-19, додека во „Ремедика“ кажала дека во семејството има член со респираторен проблем.
Бухова-Сотирова рече дека по извршениот надзор во двете болници не се утврдени прекршувања на алгоритмите и протоколите за заштита од ковид-19.
Сѐ уште се чекаат изјавите од лекарите и сестрите од ГАК кои биле на работа на 6 јуни, кога пациентката самоволно ја напуштила клиниката, за два дена потоа да оди во „Ремедика“, кога процесот на породување бил започнат.
Според досегашните наоди, сите од медицинскиот персонал на ГАК, кои биле во контакт со пациентката, носеле заштитна опрема, па според Бухова немало компромитирање ниту на вработените ниту на пациентите. Во „Ремедика“, откако пациентката била тестирана и е утврдено дека е позитивна на ковид-19, била сместена во посебна просторија и со неа контактирал посебен персонал со заштита по што таа била префрлена на Инфективната клиника.
Бухова-Сотирова рече дека во делот на тоа дали таа лажно се претставила како лекарка, рече дека се надлежни други институции, но како пациент, таа ја добила сета неопходна грижа и услуга од двете болници.
Засега нема индиции за ДСЗИ да поднесе евентуална пријава за гонење на пациентката.