Докторка, која како пациентка била примена на Гинеколошко-акушерската клиника (ГАК) во Скопје, не му пријавила на тамошниот персонал дека нејзиниот свекор е позитивен на ковид-19 и дека живеат во ист дом, пренесува „Слободен печат“.
Директорката на ГАК, Викторија Јовановска, вели дека станува збор за докторка на која свекорот бил позитивен на ковид-19. Таа не кажала и била примена без симптоми.
„Кога некој од колегите дознал дека кај неа во семејство има позитивен на ковид-19, веднаш ја симнале на еден кат подолу во оддел за изолација. Не сакала да биде во изолација. Си заминала со изјава дека ја напушта Клиниката на свој ризик и заминала во ‘Ремедика’“,
вели Јовановска за „Слободен печат“.
Таа додава дека сега се чекаат сите епидемиолошки прашалници и досега три сестри се во изолација.
„Имаме 15 лица од медицинскиот персонал од претходен случај и навистина кубуриме со персонал, зашто на ваков начин го ставила во ризик целиот медицински персонал кој бил во контакт со неа. И двете жени што беа со неа во соба ги префрливме во одделение на изолација. Јас не знам зошто е толку страшно да се каже вистината при прием. Сите носеле заштитна опрема, но сепак, треба да се кажува вистината“,
додава доктор Јовановска.