Лекарската комора информира дека го испитала случајот со пациентката која дошла на Клиниката за гинекологија во Скопје, се претставила како докторка и не кажала дека нејзиниот свекор, со кој живеат во ист дом, е позитивен на коронавирусот.
По наредба на ДЗСИ, Лекарската комора направила увид и констатирала дека пациентката не постои во Регистарот на лекари.
„Лекарската комора утврди дека пациентката не е впишана во Регистарот на лекари во РСМ и не поседува лиценца за работа, ниту пак била во постапка за стекнување со истата, односно во постапка за полагање на државен испит. Лекарската комора нема информации дали пациентката поседува диплома и се стекнала со звање доктор на медицина на некои од високообразовните институции во земјава или странство“,
се вели во соопштението.
Од лекарската комора остро го осудија однесувањето на пациентката и побараа инситуциите да ја продолжат истрагата.
„Лекарската комора остро го осудува ваквото неодговорно однесување со кое пациентката ги загрозила здравствените работници, родилките и новороденчињата во двете здравствени установи, а однесувањето уште повеќе е неприфатливо доколку навистина се работи за медицинско лице, поради што апелираме до надлежните органи да продолжат со истрагата до целосно расчистување на случајот“,
се вели во соопштението на Лекарската комора.