Во однос на оваа и на препораката за отстранување на спорните содржини од социјалните мрежи на клубот, чиј рок, патем, е веќе истечен, Бендевска нагласи дека Министерството за правда треба да достави писмо оти тоа ја има надлежноста на примената на одредбите на Законот за здруженија и фондации
Комисијата за спречување и заштита од дискриминација (КСЗД) предупредува дека денеска истекува рокот за исполнување на препораките во однос на отстранување на сите спорни елементи од името и содржината на бугарскиот клуб „Ванчо Михајлов“ во Битола. Следен чекор, посочи членот на КСЗД, Весна Бендевска, е заседавање на Комисијата и утврдување на можна прекршочна постапка.
Во однос на оваа и на препораката за отстранување на спорните содржини од социјалните мрежи на клубот, чиј рок, патем, е веќе истечен, Бендевска нагласи дека Министерството за правда треба да достави писмо оти тоа ја има надлежноста на примената на одредбите на Законот за здруженија и фондации.
„Министерството за правда има обврска да изврши вонреден надзор на законитоста во примената на Законот за здруженија и писмено да не информира. Културниот центар треба да докаже дека во Централен регистар ќе го смени името и актите во кои стои дека нивна цел е промоција на ликот, делото и идеологијата на Иван Михајлов“,
вели Весна Бендевска од КСЗД.
На денешната прес-конференција на Комисијата беше нагласено дека содржините на социјалните мрежи на клубот, чиј рок за отстранување помина, освен што шират вознемирувачки говор во кој се величаат ликот, делото и идеологијата на Михајлов, утврдени се и индиции оти имаат расна и ксенофобична содржина, при што предизвикуваат нетрпеливост, омраза и дискриминација и го повредуваат правото и слободата на поголем број на луѓе.
„Спорните содржини упатуваат не само на вознемирувачки говор, туку постојат сериозни индиции дека се повредуваат правата на поголем број на луѓе, а тоа упатува на одредби од членот од Кривичниот закон, со што топката ја префрламе на Основното јавно обвинителство“,
изјави Бендевска.
Бендевска потенцира дека иако имаат право да поведат прекршочна постапка, сепак решиле тоа да го препуштат на Основното јавно обвинителство, кое побарало од нив до достават информации и копии од спорните содржини објавени од страна на клубот на социјалните мрежи.
КСЗД минатиот месец утврди дискриминација по основа на национална и етничка припадност во врска со формирањето на здружението Културен центар „Ванчо Михајлов” во Битола.
Седиштето на Клубот беше отворено годинава во строгиот центар на Битола, чин што ја разбранува јавноста, но и институциите, поради спорното име и содржините објавени на социјалните мрежи.