Најавивме голем масовен протест на 1 Мај, кој може да прерасне во генерален штрајк, вели претседателот на Синдикатот на УПОЗ, прашан за следните чекори
Радикализација е следниот чекор ако не бидеме повикани на преговори и не седнеме на заедничка маса со Владата, најави претседателот на Синдикатот на работниците од управата, правосудните органи и здруженијата на граѓани (УПОЗ), Трпе Деаноски, во гостувањето во емисијата „360 степени“ на ТВ Алсат.
„Најавивме голем масовен протест на 1 Мај, кој може да прерасне во генерален штрајк, тоа се следните чекори“,
рече Деаноски.
Тој вели дека имаат неколку барања и дека Владата треба да сфати оти ова е нивната црвена линија. Првото е зголемување на платите за 2 806 денари – сума која е разликата од вредноста на досегашната минимална плата и новата минимална плата.
„Ова покачување го бараме за сите оние чии плати не се усогласија кај нас, а тоа се вработените со високо образование – од помлад соработник до министер, претседател на држава и премиер. За сите останати вработени во референтската категорија бараме дополнителни бодови, бидејќи навистина се премногу блиску до минималната плата што никогаш досега не се случило“,
вели Деаноски.
Инаку, вработените во управата и правосудството, предводени од Синдикатот на УПОЗ, денеска втор ден по ред ги напуштија своите работни места и излегоа на двочасовен протест. Незадоволни се од неисполнетите барања упатени до Владата за усогласување на платите со минималната плата.
Минимална плата од 18 000 денари беше договорена на 7 февруари годинава по долги преговори на Економско-социјалниот совет односно Владата, Сојузот на синдикати и работодавците.
*Повеќе вести од дебатата во „360 степени“:
Инфлацијата веќе ги изеде платите – синдикалецот Деаноски му одговори на премиерот Ковачевски
Алити: Треба да најдеме начин за зголемување на платите, но без закани за протести и штрајкови