Претседателот на Синдикатот на работниците од управата, правосудните органи и здруженијата на граѓани (УПОЗ), Трпе Деаноски, вели дека платите се веќе изедени од инфлацијата, одговарајќи на ставот на премиерот, Димитар Ковачевски, дека евентуално покачување на платите, на начин на кој бараат неколку синдикати, ќе предизвика дополнителна инфлација, која ќе го „изеде“ зголемувањето. Деаноски, во гостувањето во емисијата „360 степени“ на ТВ Алсат, рече дека износот на синдикалната минимална кошничка од јануари до март е зголемен за речиси илјада денари.
„Поточно, синдикалната минимална кошничка од месец јануари до месец март е порасната за 920 денари. Синдикалната минимална кошничка која се работи на принцип на најниските цени на производите без разлика дали е облека или исхрана. Вчера излезе Државен завод за статистика со податоци дека од месец февруари до месец март одредени основни производи за живот се пораснати до осум проценти. Сѐ уште немаме исплатено ниту минимална плата, а зборуваме за покачување односно за усогласување на платите со минимална плата, а инфлацијата расте. Како и кога ние ќе добиеме нешто за да можеме да се справиме со оваа инфлација. Да бидеме јасни – ние не бараме покачување, нам државата ни должи во управата и правосудството 26,4 проценти покачување на плати. Засега сакаме усогласување за да можеме да живееме. Ако го добиеме и кога ќе го добиеме и министерот и другите министри ги очекуваат тешки преговори за покачување на плати“,
рече Деаноски.
Деаноски посочи дека платите на 91-93 отсто од вработените во секторот што го покрива овој синдикат се под просечната плата во државава. Како пример ги посочи стручните соработници во судовите кои земаат 24 илјади денари.
„Плата на стручен соработник во суд е 24 илјади денари со правен факултет и со правосуден испит, толку е основната плата. Работата е за судија, се пишуваат пресудите, се работи сѐ само не може да се донесе одлука да се потпише пресудата на крај. Интересен податок и трагичен истовремено е дека во 2012 година просечната плата беше на ниво на помлад соработник, тоа е прво ниво со високо образование. Сега просечната плата го изеде, ние така велиме, раководителот на одделение. Од 91 до 93 отсто од платите во секторот што го покриваме како синдикат е под просекот, сите до еден. Над просекот останаа помошник раководител на сектор, раководител на сектор и државен советник. Сите други се со потпросечна плата“,
вели тој.
*Повеќе вести од дебатата во „360 степени“:
Деаноски: Следува радикализација ако не седнеме на преговори со Владата
Алити: Треба да најдеме начин за зголемување на платите, но без закани за протести и штрајкови