Министерот за внатрешни работи Наќе Чулев и началникот на секторот за внатрешни работи од Куманово, Антон Витков, денеска предадоа заштитна опрема наменета за општата болница во Куманово која се состои од заштитни костуми, визири, ракавици и маски кои министерството за внатрешни работи ги доби од Словенија и Унгарија, јави МИА.
„Денеска е Светски ден на здравјето и во таа насока со оваа донација сакаме да дадеме поддршка на докторите и сите здравствени лица во извршување на своите секојдневни обврски и задачи. Во име на Министерството за внатрешни работи сакам да изразам огромна благодарност и почит до лицата во бели мантили кои со својата посветеност и пожртвуваност секојдневно спасуваат многу човечки животи. Свесни сме за ризикот на кој тие се изложени секојдневно, но и нивната важност и значајност во овој момент и во таа насока и во иднина со сите расположливи капацитети ќе им бидеме од целосна помош и поддршка. Меѓусебната и меѓуинституционална поддршка е клучна во време во кое сите водиме тешка битка со невидлив непријател“,
истакна министерот Чулев при предавањето на донацијата.
Директорката на Општата болница Куманово, Снежана Захариева изрази благодарност за донацијата која, како што рече, доаѓа во вистински момент кога здравствените работници секојдневно ги водат најтешките битки.
Дел од опремата која министерот Наќе Чулев денеска ја донираше во кумановската болница, вчера ја прими како донација од унгарскиот министер за надворешни работи Петер Сијарто.
*поврзана вест Полицијата доби 100 000 маски и 5 000 заштитни костуми, помош од унгарската влада
*поврзана вест Мицкоски на Фејсбук ѝ се заблагодари на унгарската влада за помошта што ја носи Сијарто
Сијарто, пак, невообичаено во време кога се ограничени сите патувања во светот, на негово барање вчера престојуваше во Македонија. Освен со министерот Наќе Чулев, имаше средба и со неговиот македонски колега, Никола Димитров, кој исто така се заблагодари на донацијата.
*поврзана вест* Сијарто: Мора да им помогнеме на соседите со коронавирусот за да можат да го издржат бранот на мигранти
Другата донација со заштитна опрема, од која Чулев ре-донираше во кумановската болница, пристигна од Словенија во петокот, на 3 април. Опремата, на скопскиот аеродром ја дочека токму Наќе Чулев.
И таа донација, како и унгарската, не помина без политички превирања во земјава. Владата и министерството за одбрана тврдеа дека помошта е испратена на барање на државата, во рамките на Механизмот за цивилна заштита на ЕУ и како дел од координацијата на сојузниците во НАТО, што пак не се совпаѓаше со верзијата што јавно ја пласираше лидерот на ВМРО-ДПМНЕ, Христијан Мицкоски, дека помошта доаѓа на негово барање.
При доставувањето на донацијата, словенечката влада издаде соопштение кое не одеше во прилог на тезата на Мицкоски дека станува збор за соработка на партии од европската десница (ЕПП), туку дека помошта одела преку барање на Владата до ЕУ.
„Словенија испорача материјална помош во форма на лична заштитна опрема во вредност од 110.000 евра на Северна Македонија, со авиони на словенечката армија Турболет Л-410.
стои во соопштението објавено на веб-страницата на Владата на Словенија.
Словенија одговори во духот на меѓусебната солидарност на барањето на Северна Македонија, за кое се обрати преку механизмот за цивилна заштита на Европската унија, со цел да се спречи ширењето на ковид-19“,
Но потоа, на „Твитер“ се „дообјасни“ словенечкиот премиер Јанез Јанша, кој потврди дека помошта стигнала преку Механизмот за цивилна заштита на ЕУ ама пред тој да се активира добил повик од Мицкоски.
„Веднаш по повикот од Христијан Мицкоски, кој ја извести Владата на Република Словенија за крајно лошата состојба во Македонија со коронавирусот, ги поврзавме Министерството за одбрана на Словенија и Министерството за внатрешни работи на Македонија и во рамките на Механизмот за цивилна заштита на ЕУ, испративме помош на пријателска држава. Во исто време, лично повикав некои од лидерите во ЕУ да не ги забораваат државите од Западен Балкан.“
Притоа, Јанша ја споделува објавата на лидерот на ВМРО-ДПМНЕ, Христијан Мицкоски, од 3 април во која тој вели дека лично побарал помош од словенечкиот премиер.