Претседателот на ВМРО-ДПМНЕ, Христијан Мицкоски, на својот официјален фејсбук-профил ѝ се заблагодари на унгарската влада која денеска испрати пакети помош составена од маски и медицински заштитни костими за луѓето во првата линија во борба против пандемијата.
„Сакам да испратам посебна благодарност до унгарската влада која во овие тешки моменти за сите одвои средства и испрати помош за македонските граѓани. Денеска пристигнува унгарскиот министер за надворешни работи и голем пријател на Македонија, Петер Сијарто, заедно со пакети помош составена од маски и медицински заштитни одела за луѓето во првата линија во борба против пандемијата. Благодарност до премиерот Виктор Орбан и до целата влада од која минатата недела побарав, а денес испорача помош значајна за нашите луѓе кои се борат да спасат животи“,
напиша Мицкоски на Фејсбук.
Во услови на затворени граници, ова ќе биде прва официјална посета на земја членка на ЕУ во овие кризни времиња, вели Мицкоски, и додава дека пријателите се познаваат во тешките моменти.
Тој во истата објава најавува дека неговата партија ќе предложи до Владата да донесе уредба за парична награда на оние што се вклучени во борбата со коронавирусот.
„Благодарност и до вистинските херои кои се борат на дневна основа за нашето заедничко здравје. Сакам да соопштам дека многу брзо ќе поднесеме и уредба до Владата за парична награда за оние што се вклучени во заштитата на здравјето и борбата против короната. Потребна е поддршка и заедничка грижа за хероите. Се надевам дека целата Влада ќе ја поддржат иницијативата, но уште поважно, така заеднички ќе испратиме благодарност до оние што се вложуваат себеси, за сите нас“,
порача Мицкоски.