Бугарскиот премиер, Бојко Борисов, во интервју за Сител избегнуваше директен одговор на прашањата – дали неговата земја ќе ги блокира пристапните преговори на Северна Македонија со Европската Унија ако не се решат прашањата што официјална Софија ги смета за отворени. Интервјуто на Борисов доаѓа по информациите дека Бугарија вложила изјава кон записникот од заседанието на Советот за општи работи на ЕУ на кое беше донесена одлука за почеток на преговори со земјава.
Во изјавата, Бугарија ги наведува своите ставови во врска со тоа што треба да содржи Преговарачката рамка за Северна Македонија и кои услови треба да се исполнат за да се закаже првата меѓувладина седница. Меѓу другите работи, се бара заедничката историска комисија да стигне до компромисни наративи за редица херои и настани од крајот на 19 и почетокот на 20 век, како Гоце Делчев и Илинденското востание.
За прашањето за јазикот, Борисов во интервјуто, исто така, избегнуваше директен одговор, обидувајќи се да имплицира дека двата јазика се многу блиски и дека народите во двете земји се разбираат меѓу себе без преведувачи.
Сепак, бугарската страна, според Борисов, се држи до формулацијата од Договорот за пријателство и добрососедство меѓу двете земји, каде стои „македонски јазик согласно Уставот на Република Северна Македонија“.
*Поврзана вест: На повидок нова блокада: Бугарија го условува датумот за преговори со ЕУ со македонскиот јазик и малцинство
Борисов рече дека многу Бугари сметаат дека дозволувањето на македонизмот е големо историско предавство.
„Велат дека тоа е отстапување и предавство на историјата. Така што и вие треба да ме разберете мене и нашата политика. Комисијата за историја на Македонија и Бугарија треба да најде прифатлив текст за историјата, која наместо да нè дели, треба да нè обединува.“,
додаде Борисов.
Тој рече дека со две раце нè поддржале за членството во НАТО, но сега сè зависи од нас самите.
„Поддршката за Северна Македонија била искажувана секогаш. Тоа што сега треба да го направиме е македонско-бугарската комисија за историја и оние што се занимаваат со историјата да си ги завршат спорните теми. На последниот Совет на ЕУ ние зборувавме за максимална поддршка на Северна Македонија како и за Албанија, така што сега се е во рацете на Македонците“,
рече Борисов.
*Поврзана вест: Бугарскиот европратеник Ковачев: Во Македонија живеат Македонци што зборуваат македонски јазик
Според Борисов, со Договорот за добрососедство е покажана волја и разбирање, а токму тоа е потребно за одење напред.
„Ние сме државата која прва почна и со Договорот за добрососедство направи можност воопшто да се зборува за присоединување кон ЕУ на нашите мили браќа и сестри. И второ, направивме апсолутно се за да помогнеме. После тоа тргна и процесот со Грција. Јас и Зоран Заев направивме многу работи и за Цар Самуил и во Ватикан кога бевме заедно, и кога дојдов во Скопје за споменот на загинатите македонски Евреи. Ние направивме многу работи со кои покажавме волја и разбирање со кое можеме да одиме напред“,
рече Борисов.