Првообвинетиот во „Рекет“, Бојан Јовановски-Боки 13, денеска повторно пред Апелацискиот суд во Скопје побара да му се укине мерката притвор во затворот во Шуто Оризари и ја понуди гаранцијата од околу 146 000 евра, која ја нудеше и претходно. Станува збор за гаранција во недвижности, дуќан во центарот на Скопје и куќа во Тафталиџе со кои гарантира дека нема да избега.
Боки и неговиот адвокат Сашко Дукоски пред второстепениот суд порачаа дека не може како причина за определување притвор да се користи флоскулата „степен на кривична одговорност“ бидејќи тој во моментов не е осуден ниту, пак, да се наведува дека постои опасност од бегство затоа што нема оформено потесно семејство. Точно е дена тој нема засновано свое семејство, рече адвокатот, но тој е дел од потесно семејство со неговите родители.
„Остро ги осудувам таквите дискриминирачки факти“,
рече Боки во Апелација.
И тој и неговиот бранител го споменаа Зоран Милески-Кичеец, кој призна вина и е осуден со првостепена пресуда од 3 години затвор, но додека таа да стане правосилна (додека Апелација не се изјасни за жалбата за висината на казната) излезе од домашен притвор со понудена гаранција.
„Лицето во овој предмет не е за помагање, туку се води како соизвршител. Но, во тек на истрага излегува од притвор во домашен притвор, а по пресудата му се укинува и домашниот притвор. Излегува дека тој полесно може да излезе од притвор отколку што јас можам да влезам во маркет. Се добива впечаток дека судот само кон Бојан има таков третман“,
рече Дукоски.
Боки, исто така, рече дека забележува дека има некоја тенденција против него.
„Во однос на Кичеец неколку пати кажав зошто се чувствувам обесправено. Имате негово признание на вина, имате судска одлука и мислење дека може да остане на слобода“,
рече Боки.
Здравствената состојба, но и ситуацијата со ковид-19 тој исто така ги наведе како причина да му се укине притворот во Шутка.
„Во време на пандемија кога полициските мерки се ставени на високо ниво, имате затворени граници и човек кој не сака да бега, сметам дека треба да се уважи нашата жалба за притворот“,
порача обвинетиот.
Тој е во притвор од 15 јули 2019 година кога се отвори истрагата. За секое продолжување на притворот за 30 дена, заедно со неговиот адвокат, поднесуваше жалба до второстепениот суд.
Тој и Катица Јанева, која е во домашен притвор, се во очекување на пресудата во предметот „Рекет“. Изрекувањето во Основниот кривичен суд во Скопје е закажано за 18 јуни, а на изминатите три рочишта двајцата заедно со нивните адвокати и обвинителката Вилма Русковска ги кажаа завршните зборови. Одбраната побара ослободителни пресуда, а обвинителството осудителна.
*Поврзани вести:
„Рекет“: Пресуда за Боки и Јанева на 18 јуни
Боки 13: Ако заиграат црвените телефони може да добиеме и драконски казни
Јанева: Како баница го распарталивме обвинението на Русковска, не дојде за да не се црви
Одбраната на Јанева за Камчев: Дали нападот е најдобра одбрана?
Кадиев: На снимките од телефонот на Боки не се гледа ни давање ни земање пари