Доколку ги знаете сопружниците Орце и Ана Камчеви, како што јас ги знам, не би им дозволиле да се приближат до судската зграда, а не па да сведочат. Нивниот кредибилитет не може да се мери, тие се дно на дното, рече Катица Јанева на почетокот на завршните зборови во „Рекет“ напаѓајќи ги бизнисменот и неговата сопруга.
Брачната двојка Камчеви беа клучните сведоци на обвинителката Вилма Русковска. Бизнисменот го пријави случајот, а Јанева тврдеше дека тој сакал да се приближи и да соработува. Кога зборуваше за него не го штедеше речникот.
„Сум слушнала и видела. Тој е валкан и злобен играч, мисли дека може секого да купи, ама се зае.ал. Може некој друг, а не мене… Го искористија искреното пријателство што го имавме со Бојан, да ме стават на столбот на срамот. Не би сакала да сум ви во кожа за оваа пресуда. Мене ми е чист образот. Ако некој сакаше да го сруши СЈО, не му требав јас. Јас да лежам во притвор за Орце Камчев?! За недокажани пари дека се земени? За недокажано дека ги извадил од своите сметки? Што ќе беше ако имаше шеќер пред мене? Ќе речеа дека е кокаин? Јас сум 55-годишна жена. Произлегувам од судско семејство. Имам пари да се издржувам и не му се понижувам на никој“,
зборуваше возбудено Јанева.
Со остри зборови се обрати и кон судечкиот совет, но и кон обвинителите и судсите, на кои им порача дека заслужува пофалба од нив бидејќи да не била таа да кажела јавно дека се потребни пари и поголем кадар, тие денеска немаше да имаат повисоки плати за 35 проценти.
Со жесток речник зборуваше и за „некои обвинителки“, правеше споредба со тимот кој го избра за СЈО и рече кога бирала, иако многумина сакале да влезат таму, не сакала да зема такви кои се неспособни и „се остарени и кризираат ако после 16 часот не се напијат ракија“.
Таа употреби остар речник и кога зборуваше директно за обвинителката Вилма Русковска, која денеска не беше во судницата бидејќи беше на рочиште за случајот со организаторите на „27 април“. На нејзино место беше обвинителката Сузана Мирческа-Кузмановска. Вчера, пак, кога завршни зборови даваше Бојан Јовановски, во судница беше обвинителот Наум Паноски.
„Што би рекле Србите: ‘Изеде ме туѓа срамота’. Да подигнеш обвинение без вештачење, да биде прифатено од тројца судии, а без половина докази да се доставени до судот. Се срамам што сум дел од овој процес. Нема никакви докази, а што е најважно немаме пари. Каде се парите? Овие два дена го распарталивме како баница, а тоа го слушнаа обвинители кои не заслужуваат. Не дојде за да не се црви тука“,
зборуваше Јанева.
Таа цитираше дел и од воведни зборови на Русковска, кога рече дека имало еден филм „Чарлиеви ангели“, во кој влегла Јанева, но се заплеткала во мрежата на самопрогласената естрадна ѕвезда Боки 13.
„Токму заради овие зборови очекувавме дека, ете, сега Јавното обвинителство ќе ни го покаже тој филм и ќе даде една критика за истиот. Но, се прикажа дека слушнавме само едно малициозно критизерство“,
рече поранешната шефица на СЈО, а сега обвинета во случајот „Рекет“.
Со зборувањето за „Чарлиевите ангели“, рече Јанева, Русковска ги навредила сите обвинители кои биле дел од СЈО, а во текот на процесот го вреѓала и по Боки.
Секап, Јанева смета дека не посрамотила никого, има со што да се гордее, а во конкретниот случај се огласи оти е невина и не направила никакво кривично дело, туку дека е грубо изманипулирана.
Со нејзините завршни зборови во судскиот процес остана уште да се изрече пресудата. Судијката Васка Николовска-Масевска изрекувањето го закажа за 18 јуни.
Пред Јанева, денеска завршни зборови дадоа и нејзините адвокати Ирена Фрчкоска и Дељо Кадиев.
Околу четири часа тие го анализираа секој сведок и секој доказ. Тие рекоа дека дале многу пологични заклучоци дури и за доказите на обвинителството и порачаа дека некој не може да биде огласен за виновен ако во судската постапка без сомнение не се докаже тоа. Презентираа и документи од мислењата кои ги давале Јанева и СЈО и за притворот и за издавањето на времениот пасош на Камчев, а потенцираа дека временски негативните мислења се давани по дента кога е направена снимката со 50 000 евра во дневната на Јанева, како и по датумот за кога обвинителството тврди дека Камчев дал еден милион евра.
Заедно со Камчев, рекоа, од притвор излегоа и други осомничени во „Империја“, а за враќање на пасошот посочија дека Јанева прво дала негативно мислење, а позитивно дошло бидејќи имало променети околности односно кога бизнисменот побарал патна исправа за деловни патувања.
Повикувајќи се на Законот за кривична постапка, нагласија дека во надлежност на обвинител е да бара и дава мислење за мерките, па прашаа како тоа може да претставува пречекорување на овластувањата?
Бојан Јовановски-Боки 13 и неговиот бранител Сашко Дукоски завршните зборови ги дадоа вчера, а обвинителката Вилма Русковска минатата недела.
*Поврзани вести:
Боки 13: Ако заиграат црвените телефони може да добиеме и драконски казни