Јовановски информираше дека денеска во „Слобода превоз“ и во „Макекспрес“ влезена е УЈП и дека тековно се доставуваат документите и податоците од нивното работење да ги има на увид
Со оглед на информацијата од МВР дека утре доаѓа висока делегација од Германија на чело со претседателот, ги замолив превозниците да покажат со гест дека не сакаат да го нарушат угледот на државата и да не ги отежнат безбедносните протоколи, да се повлечат од блокадите во период на присуство на делегацијата односно до четврток, а доколку до тогаш не се постигне некаков договор со Градот Скопје и ЈСП, на улица ќе излезат повторно во петок, изјави вечерва за МИА директорот на „Слобода превоз“, Ленин Јовановски.
Тој најави оти тогаш ќе се блокира со сите 200 автобуси и Скопје ќе биде блокирано на повеќе сообраќајници сè до конечно решавање на проблемот.
„Иако правото на протест не беше спорно, дури и во вакви околности, сепак, покажавме свест и одговорен однос кон она што е државен интерес. Борбата продолжува и таа никогаш не може да е лесна, ама ќе победиме, најмногу од сè заради тоа што правдата е на наша страна и заради тоа што сме единствени“,
вели Јовановски.
Денеска, како што додаде, приватните превозници покажале единство и сериозност во намерите да ја истераат правдата на виделина и да го свртат вниманието на целата јавност за проблемот со кој се соочуваат.
„После седницата на Советот на Град Скопје на која присуствуваме видовме дека и на сите советници им е повеќе од јасно дека неспособноста на градоначалничката и менаџментот на ЈСП се оние кои доведуваат до ваквите состојби“,
додава Јовановски.
Тој претходно истакна дека во неговото 23-годишно искуство со сите градоначалници до денеска немале ваква ситуација, некој да им посочи дека треба да ги тужат, бидејќи, како што кажа, сите проблеми што ги имале ги решавале на маса.
„Сега имаме ситуација кога покрај тоа што никој не сака да седне на маса и да понуди решение, дури нема одговор ни на оние основни прашања што треба да се одговорат и јавноста да ги знае за да и биде појасно зошто сето ова се случува, и како некој планира ова да го реши“,
изјави тој.
Јовановски информираше дека денеска во „Слобода превоз“ и во „Макекспрес“ влезена е УЈП и дека тековно се доставуваат документите и податоците од нивното работење да ги има на увид.
Прашан околу тврдењата дека приватните превозници продаваат билети тој одговори дека не продаваат и дека тие информации се без аргументи.
„Ако имаа документ ќе извадеа. Нашите документи се доставени до сите советнички групи во Град Скопје по однос на картичките. Долгот е усогласен и тој е во таа висина заедно со ЈСП и не е спорен, тој постои“,
истакна Јовановски.