Приходната страна на ребалансот е подигната за 4,7 проценти, односно приходите се проектирани на ниво од 222,6 милијарди денари. Расходите се планирани на ниво од 268,8 милијарди денари или за 8,6 проценти повеќе во однос на иницијалниот буџет. Новина е новата потпрограма за зелен развој
Зголемување на капиталните инвестиции и продолжување на поддршката за стопанството се двата клучни сегмента во ребалансот на буџетот за 2021 година, што денеска го усвои Владата, објави попладнево министерот за финансии Фатмир Бесими.
Приходната страна на ребалансот е подигната за 4,7 проценти во однос на иницијалниот буџет, односно приходите се проектирани на ниво од 222,6 милијарди денари. Расходите се планирани на ниво од 268,8 милијарди денари или за 8,6 проценти повеќе во однос на иницијалниот буџет. Проекцијата за раст останува 4,1 отсто.
Капиталните расходи се проектирани на ниво од 30,5 милијарди денари или за 6,5 милијарди денари се повисоки во однос на планот за 2021 година. Нивното учество во вкупните расходи на буџетот од иницијално планираните 9,4 проценти, се зголемува на 11,3 проценти што е повисоко ниво од просекот во последните десет години.
Има кратење на расходите кај повеќе буџетски корисници по два основа: по основ на помалку продуктивни трошоци и по основ на проекти кои имаат послаба динамика на реализација. Овие средства ќе бидат насочени кон ставки кои се очекува да дадат поголем процент на реализација и поголема додадена вредност на економијата.
Дефицитот е проектиран на ниво од 46,2 милијарди денари, односно 6,5 проценти од БДП. Тој заедно со отплатите од претходните задолжувања во износ од 43,3 милијарди денари, ќе се финансираат од надворешни и домашни извори.
„Во рамки на отплатите по основ на претходни задолжувања влегуваат еврообврзницата издадена во 2014 година, во износ од 500 милиони евра која доспева во јули, државните обврзници во износ од 4,68 милијарди денари и структурните обврзници во износ од 1,44 милијарди денари. Домашното задолжување во износ 23 милијарди денари, ќе се реализира преку државни хартии од вредност со истовремена отплата на државни обврзници во износ од 4,68 милијарди денари, така што нето-задолжувањето ќе изнесува 18,45 милијарди денари кои ќе бидат искористени за финансирање на потребите во тековната 2021 година како и за делумно финансирање на 2022 година. Задолжувањето во странство се реализира преку повлекување на средства од поволни кредити од странски финансиски институции, наменети за финансирање на одделни проекти вкучително и заем од ММФ, втората транша од заемот од ЕУ за макрофинансиска поддршка во износ од 80 милиони евра која неодамна ни стана достапна, како и еврообврзницата која веќе ја повлековме“,
рече Бесими.
Според него, ребалансот е соодветен одговор на фискалната политика на тековните случувања и претставува важен чекор на патеката кон стабилизација на економијата.
Новини во ребалансот се новата потпрограма за зелен развој, нови инструменти, како развојна обврзница и зелена обврзница кои ќе бидат наменети исклучиво за инвестиции и зелен развој. Наскоро се очекува да биде презентиран и планот за финансирање на забрзаниот раст кој се очекува да овозможи нови инвестиции и работни места.
Премиерот Зоран Заев оцени дека ребалансот е поддршка за стабилна и развојна економија. Приоритетите ќе бидат насочени кон надминување на последиците од кризата преку зголемување на инвестициите и поддршка на компаниите.
„Економијата е стабилна. По импактот на третиот бран на ковид-19 во првото тримесечје, со умерен пад од 1,9 проценти, податоците на државната статистика покажуваат позитивни движења во економијата“,
истакна Заев и додаде дека во индустријата во март е прекинат падот на производството од претходните два месеца, а во април растот достигнал 41, 6 процент на годишна основа. Во првите четири месеци од годинава расте и искористеноста на производствените капацитети, а забележан е и раст кај трговската размена.
Поволните глобални движења се очекува позитивно да влијаат и врз движењата во домашната економија. За еден процент се очекува зголемување на бројот на вработени, а стапката на невработеност да се намали на 15,8 проценти.