Во текот на јуни, веројатно пред Собранието ќе се најде предлог за ребалансот на Буџетот, најави министерот за финансии Фатмир Бесими вечерва, во гостување на ТВ 24.
Според него, главно како причина за ребалансот се динамиката на пандемијата и вакцинирањето, со оглед на тоа дека дополнително се продолжи со фискалната поддршка во економијата, а потоа и потребите во здравство за вакцини и друго.
Според него, досега не се разговарало за данок на финансиски трансакции како што имаше информации во јавноста, а Буџетот е во добра кондиција.
„Од она што го гледаме сега, приходите, реализацијата на Буџетот е во добра кондиција во споредба со истиот период лани, така што во овој период сите проекции ни се врз основа на постојниот даночен систем“,
рече Бесими.
Тој повтори дека оптимизмот за најавениот економски раст од пет проценти го темели на четири столбови, односно, како што рече, закрепнување на економијата и поддршка во време на криза, одржливост во смисла на инфрастуктура и макроекономска стабилност, зајакнување на подготвеноста на приватниот сектор да биде конкурентен, како и зајакнување на човечкиот капитал.
Тука, како што рече, влегува и одржливиот раст за животна средина, дигитализацијата и други проекти, деловната клима.