Полиците за бел и полубел леб во продавниците и маркетите од денеска повторно се полни, но сега овие видови леб се продаваат по замрзната цена од 33 денари
Откако три дена граѓаните не можеа да купат бел и полубел леб, од денеска на полиците во продавниците и маркетите тој повторно може да се најде, но сега по замрзната цена од 33 денари.
Полиците за леб останаа празни откако Групацијата на мелничко-пекарската индустрија донесе одлука да не произведуваат и носат бел и полубел леб, согласно Одлуката на Владата тој да се продава по замрзната цена од 33 денари, а образложението им беше дека на тој начин ќе претрпат огромни загуби.
По два дена бојкот, од Групацијата вчера донесоа одлука дека овие типови леб од денеска ќе се продаваат за 33 денари, а на Владата ѝ порачаа дека битката против оваа одлука ќе ја водат на правна основа.
Од Групацијата рекоа дека одлуките на Владата прават огромни штети и загуби на индустријата на месечно ниво кои се во износ од над 1,5 милиони евра и оти поради наметнатите загуби, пекарската индустрија е принудена да се приспособи и да ги намали цените за одредени видови леб, но и да намали на бројот на вработени за да опстане во иднина.
Одлуката на Групацијата дојде откако Владата им наложи на производителите и трговците дека имаат обврска да произведуваат и продаваат леб по замрзната цена. Ваква одлука Владата имаше донесено во четвртокот на седница, а таа веднаш беше објавена во „Службен весник“, со што стапи во сила.
Претходно, инспекторите од Државниот пазарен инспекторат ги контролираа трговците дали се почитува Одлуката овие типови леб да се продаваат по замрзната цена од 33 денари, а од извршените контроли рекоа дека се изречени казни за три скопски и една кумановска фирма. На четирите фирми им се изречени парични казни од над 300 000 денари.
Владата во вторникот одлучи да ја замрзне цената на лебот на 33 денари.
„Ја замрзнуваме цената на белиот и полубелиот леб, сечен на парчиња или цел, на 33 денари, односно цена од 33 денари по леб со тежина од 450 грама и повеќе, а за леб со тежина под 450 грама се утврдува цена во висина до 33 денари по леб која ќе биде во сооднос со тежината на лебот“,
рече Ковачевски.
Замрзнувањето на цената, министерот за економија Крешник Бектеши ја оправдува со анализите што ги имаат направено во соработка со Државниот пазарен инспекторат и со одредени пекарници, членки на групацијата на пекарници во нашата држава.
Од Владата најавија дека до крајот на наредната недела ќе се разгледа мерката да се замрзнат цените и на други производи како што се тестенините и млечните производи.