Премиерот одговори на изјавите на Филипче порачувајќи дека наместо да се извини за катастрофалното менаџирање со државата, опозицијата продолжува да ги брани владите на Заев и Ковачевски
Сметките од работењето на претходните влади предводени од Зоран Заев и Димитар Ковачевски денес паѓаат исклучиво на грбот на граѓаните, и не смее да се дозволи такво владеење никогаш веќе да се повтори, рече премиерот Христијан Мицкоски по посетата на компанијата „TESSA Energy“, одговарајќи на новинарско прашање за коментар на изјавите на лидерот на СДСМ, Венко Филипче, кој застана во одбрана на претходните раководства.
„Жалам што СДСМ повторно ја испушта можноста да се извини за сите оние погрешни, криминални, бандитски, анационални политики од тие две влади за коишто СДСМ денеска излегува во јавноста и ги брани, односно владата на господинот Заев и господинот Ковачевски. Наместо да се извини и да се повлече од сето тоа што го имаат направено, тие уште го промовираат тоа“,
рече Мицкоски.
Мицкоски рече дека огромното мнозинство од народот го дели неговиот став околу лошото менаџирање со кризите во минатото, посакувајќи такви влади никогаш веќе да не ѝ се случат на Македонија. Тој го искритикува начинот на кој, како што кажа, поранешните функционери денес го поминуваат своето време, посочувајќи на големиот контраст меѓу нивниот луксуз и реалноста на народот. Премиерот вели оти додека граѓаните ги плаќаат скапите сметки од нивното неодговорно справување со државата, поранешните власти уживаат во егзотични дестинации, се возат на луксузни јахти и се забавуваат со балкански музички ѕвезди.