Бектеши: Мерката „гарантирана цена“ најверојатно ќе биде продолжена до крајот на годината

Од дел од бизнис-секторот чија дејност е производство на прехранбени производи велат дека чувствуваат негативни последици од мерките. Според комерцијалниот директор на фабриката за кондиторски производи „Лион“ – Свети Николе, Никица Павловски, најголем проблем е забраната за акции и промоции на производите поради замрзнатите цени, како и зголемувањето на ДДВ-то на дел од производите

Прашан за ваквите наводи и дали мерката може да се коригира во делот на промоциите и акциите како што бараат стопанствениците, Бектеши рече дека и сега може да се прават акции и промоции, но притоа во делот на производите кои се означени со „гарантирана цена“ треба да се наведе дека тоа е дополнително намалување на цената, а не е акција поради истек на рок

Мерката за намалување на цените на основните прехранбени производи – „гарантирана цена“ што Владата ја донесе кон средината на септември, според министерот за економија, Крешник Бектеши дава резултати и ја има поддршката на потрошувачите.

Иако проектирана да важи до 30 ноември, Бектеши, повикувајќи се на податоците и анализите што ги имаат за нејзиното спроведување, најавува дека мерката најверојатно ќе биде продолжена до крајот на годината.

„Според моменталните податоци и анализи, мерката најверојатно ќе продолжи до крајот на годината за да нема нарушување на пазарот во декември кога има поголема потрошувачка“,

изјави министерот за економија, одговарајќи на новинарски прашања пред почетокот на Деветтиот FMCG SUMMIT во организација на магазинот „InStore“ и „Кликер маркетинг“.

Бектеши додаде дека денешниот настан ќе биде можност за отворена и транспарентна дискусија со стопанските комори и со другите чинители од бизнис-секторот за мерките.

„Очекуваме нивни сугестии како да се подобрат мерките и да бидат во насока на намалување на цените“,

рече тој.

Бектеши го објави списокот на производи што ќе поевтинат

Со „гарантираните цени“ на производите, Бектеши очекува намалување на инфлацијата на храната за пет отсто до крајот на ноември

Од друга страна, од дел од бизнис-секторот чија дејност е производство на прехранбени производи велат дека чувствуваат негативни последици од мерките.

Комерцијалниот директор на фабриката за кондиторски производи „Лион“ – Свети Николе, Никица Павловски, кој учествува на настанот, изјави дека по одлуката на Владата за замрзнување на цените на основните прехранбени производи фирмите бележат пад на продажбата. Како проблем, тој ја посочи забраната за акции и промоции на производи додека трае мерката, како и зголемувањето на ДДВ-то за дел од производите од 5 на 10 отсто.

„Поминаа веќе четири-пет недели од донесената одлука од 15 септември. Она што ни се случува на пазарот е дека имаме пад помеѓу 20 и 30 проценти, зависно од компаниите и имаме забрана за акции и за промоции коишто ни прават дополнителни тешкотии, а со покачувањето на ДДВ на некои од производите, тоа уште повеќе се чувствува. Граѓаните со години се научени да купуваат производи на промоција. Сега промоциите се забранети, а дел од производите се покачени со покачувањето на ДДВ-то“,

вели Павловски.

Неговите очекувања, како што рече одговарајќи на новинарско прашање, се Владата да ја прекине оваа одлука барем во делот кој се однесува на промоциите. За замрзнатите цени, Павловски рече дека не може да зборува затоа што неговата компанија нема производи од референтната листа на производи со намалена цена.

„Во делот на промоциите и акциите, тие насекаде во регионот функционираат иако има замрзнати цени. Мислам и дека буџетот со ДДВ не се полни според планираното затоа што падот на личната потрошувачка е огромен“,

рече Павловски.

Ковачевски смета дека е фер списокот на производи со покачен ДДВ: Секој лекар ќе ви каже дека не е добро чипсот да е дел од основната исхрана

Доколку властите сакаат по секоја цена да ги намалуваат цените на производите, рече тој,  тогаш треба да се разговара за прашањето за набавката на суровините.

„Ние сме увозна земја, ги увезуваме сите суровини и немаме свое производство. Затоа ни треба долгорочна стратегија како да најдеме поевтини суровини“,

вели комерцијалниот директор на фирмата од Свети Николе.

Прашан за ваквите наводи и дали мерката може да се коригира во делот на промоциите и акциите како што бараат стопанствениците, Бектеши рече дека и сега може да се прават акции и промоции.

„Колку што сум информиран и со постојната мерка имаат можност да прават акции и промоции само што во делот на производите кои се означени со ’гарантирана цена’ треба да го наведат фактот дека тоа е дополнително намалување, а не е акција заради истек на рок за да биде јасно за потрошувачите. Доколку, пак, е акција заради истек на рок и тоа јасно, прецизно и концизно треба да биде наведено за да не се стават во заблуда потрошувачите и граѓаните“,

посочи министерот за економија.