Претходно вчера, украинскиот претседател Володимир Зеленски изјави оти е убеден дека проектилот што падна и експлодира во Полска и уби две лица не бил украински
Американскиот претседател Џо Бајден го оспорил коментарот на украинскиот претседател Володимир Зеленски дека проектилите што паднале во Полска не биле од украинско потекло, пишува Ројтерс.
„Тоа е доказ“,
им рече Бајден на новинарите во Белата куќа по враќањето од патувањето во Азија.
Претходно вчера, украинскиот претседател Володимир Зеленски изјави оти е убеден дека проектилот што падна и експлодира во Полска и уби две лица не бил украински.
„Не се сомневам дека тоа не беше наша ракета“,
ја пренесува новинската агенција Интерфакс изјавата на Зеленски.
Тој рече дека својот заклучок го засновал на извештаите на украинската армија, во кои, како што кажа, „не може, а да не верува“.
Изјавата на Зеленски дојде откако полскиот претседател Анджеј Дуда рече дека проектилот што паднал врз неговата земја „веројатно бил користен од украинската воздушна одбрана“, но дека нема индикации оти експлозијата во Полска е „намерен напад“.
По состанокот со НАТО-сојузниците, генералниот секретар на Алијансата, Јенс Столтенберг, изјави дека падот на ракетата во Полска не бил намерен напад, а оти засега нема индиции дека Русија подготвува воени акции против НАТО.
Во меѓувреме, шефот на украинскиот Совет за национална безбедност Олексеј Данилов вчера објави оти Украина има докази за руска трага во експлозијата во Полска за која Варшава и НАТО велат дека најверојатно била предизвикана од украински проектил за воздушна одбрана.
Дополнително, тој посочи дека Украина бара итен пристап до местото на експлозијата.