„Доколку постојат докази, а не ги доставува до надлежните истражни органи, ќе значи прикривање на доказите. Или, пак, доколку постојат докази, а ги објавува јавно како документација која е дел од предметот, тоа значи компромитирање на доказите и на целата истражна постапка“, рече министерот за внатрешни работи Оливер Спасовски во денешното сведочење пред собраниската Анкетна комисија за случајот со Клиниката за онкологија
Доколку кој било граѓанин поседува какви било докази, тие докази да ги достави до надлежното јавно обвинителство и на тој начин да помогне во истрагата. Тоа е важно за која било постапка што се води.
Ова го посочи министерот за внатрешни работи Оливер Спасовски на денешната седница на собраниската Анкетна комисија во врска со случајот на Клиниката за онкологија одговарајќи на прашање на пратеник за наводите што вчера ги изнесе лидерот на опозициската ВМРО-ДПМНЕ, Христијан Мицкоски, за случајот повикувајќи се на материјали и извештаи кои партијата ги добила од свиркачи, а се однесуваат на периодот до август годинава.
Спасовски рече дека тој не може да знае ниту треба да знае кој и какви намери има со објавувањето на какви било информации.
„Доколку постојат докази, а не ги доставува до надлежните истражни органи, ќе значи прикривање на доказите. Или, пак, доколку постојат докази, а ги објавува јавно како документација која е дел од предметот, тоа значи компромитирање на доказите и на целата истражна постапка“,
рече Спасовски, пренесува МИА.
Министерот за внатрешни работи истакна дека во моментот не смее да изнесува информации и податоци за тоа кои документи се одземени од страна на МВР преку наредбата од надлежниот суд и обвинителство во врска со случајот за кој Основното јавно обвинителство Скопје води предистрага.
Спасовски посочи дека целата постапка во врска со Клиниката за онкологија почнала на 31 август 2023 година кога првпат од страна на Криминалистичката полиција, Секторот за борба против економски криминал и корупција било доставено известувањето до Обвинителството посочувајќи дека постапувањата траат до денеска и ќе продолжат да траат се до завршување на целата постапка.
„Сите информации, оперативни сознанија, податоци кои што ги прибираме и можат да бидат од корист на истрагата и завршување на целиот овој предмет и сите барања кои се добиваат од страна на ОЈО за постапување се анализираат и се доставуваат во истрагата затоа што веројатно сето она што може да биде од помош, од корист за да дојдеме до конечниот одговор е суштината на целиот овој предмет. Сите аспекти кои се поврзани со настанот се анализираат“,
рече министерот за внатрешни работи.
На забелешката на пратеникот од ВМРО-ДПМНЕ, Зоран Коцевски, дека министерот во неколку наврати во своето обраќање го користи терминот истрага и барањето да одговори дали случајот се наоѓа во предистражна или истражна постапка, министерот Спасовски го упати за подетални информации за случајот да се обрати до Основното јавно обвинителство Скопје.
На прашања на Анкетната комисија во Собранието денеска одговара и државниот јавниот обвинител Љубомир Јовески, а по вторпат треба да биде сослушан и поранешниот директор на Клиниката за радиотерапија и онкологија Никола Васев.
На денешната седница биле поканети да сведочат и поранешниот министер за здравство Венко Филипче и Миле Сугарев, актуелен директор на Фондот за здравствено осигурување. Мизрахи на почетокот на седницата информира дека Сугарев не можел да присуствува на седница поради службен пат надвор од Скопје. Таа, исто така, соопшти дека поранешниот министер за здравство Филипче со допис ја известил Анкетната комисија дека поради приватни обврски и патувања во странство не може повторно да се појави пред Комисијата.
Тој известил и дека во првото сведочење одговорил на сите прашања и ги кажал своите ставови за овие процеси и оти стои на располагање да одговори писмено.
Претходно денеска претседателката на Анкетната комисија соопшти дека ќе побара продолжување на рокот за работа на оваа Комисија, како и проширување на опфатот на периодот на кој се однесува нејзината работа.
Како образложение таа ги наведе, како што рече, новите сознанија кои вчера во јавноста ги изнесе лидерот на ВМРО-ДПМНЕ, Христијан Мицкоски, од чии редови е и пратеничката која претседава со Анкетната комисија за случајот „Онкологија“.
Лидерот на опозициската ВМРО-ДПМНЕ вчера презентираше извештај од Фондот за здравствено осигурување од извршена вонредна финансиска контрола на условниот надоместок во Универзитетската клиника за радиологија и онкологија за периодот од 1 август 2021 година до 1 август 2023 година. Рече дека периодот кој е опфатен во извештајот не е дел од предистрагата за случајот „Онкологија“.
На наводите и документите кои беа објавени од опозициската ВМРО-ДПМНЕ денеска реагираа од Клиниката за радиотерапија и онкологија, од каде што велат дека тие се дел од документацијата која уште од почетокот на истрагата е предадена на истражните органи и на Анкетната комисија во Собранието.