Во моментов речиси 600 пациенти заболени или сомнителни на ковид-19 се сместени во инфективните одделенија низ земјава. Доколку болниците се преполнат, опција е пациенти да се испраќаат во други земји
Инфективните одделенија се преполнуваат, а пациенти со ковид-19 се сместуваат и на интерните одделенија во дел од болниците низ земјава, информираше министерот за здравство Венко Филипче.
Тој вели доколку има потреба ќе бидат ангажирани и дополнителни медицински лица од другите оддели во болниците, а тоа ќе ја отежне работата за лекување на пациенти со други болести.
„Доколку дојде ситуација да е потребно да се ангажира уште поголем број на медицински лица, апсолутно дека ќе се пренаменат и другите болнички капацитети од интернистички одделенија. Во болниците Битола, Прилеп и Охрид веќе се сместуваат пациенти на интернистички одделенија. Можно е да се соочиме со ситуација кога и друг кадар ќе работи само со пациенти со ковид-19. Можно е да има период кога целокупниот останат програм ќе да се намали со цел целиот кадар да се посвети на лекување на пациентите со ковид-19“,
рече Филипче.
Министерот рече дека со наплив на пациенти во болниците се соочуваат и други европски земји кои препраќаат пациенти во други држави. За такво сценарио вели, се спрема и министерството за здравство, иако засега вели, не верува дека ќе има потреба за тоа.
„Насекаде во Европа дури и разменуваат и праќаат пациенти од една во друга држава. Се надевам дека нема да се случи такво сценарио, но и за такви моменти се спремаме“,
рече Филипче.
Филипче на денешната посета во болниците во Струмица и Штип рече дека притисокот врз болниците е голем и дека се надева оти новите мерките ќе придонесат да се намали ширењето на вирусот.
За обезбедување повеќе место за пациенти со коронавирус, еден спрат од новото болничко крило во струмичката болница ќе биде ковид-одделение. Тој е опремен со сто легла и централен довод на кислород, а проблемот со персоналот ќе се надополнува со здравствени работници од интерна медицина.
Од штипската болница пак, веќе се префрлаат пациенти во болницата во Кочани.
„Болниците преполнуваат, тоа е нешто што сите земји сакаме да го избегнеме. Овие мерки што се на сега на сила имаат за цел да имитираат некаков облик на полициски час, значи лимитирање на бројот на конакти, носење маски, избегнување на групирањето сето тоа што може да значи намалување на трансмисија на вирусот“,
рече Филипче.
Пациентите со најтешка клиничка слика до сите градови се препраќаат во Скопје, каде постепено се полни и монтажната болница за ковид-19.
Филипче рече дека се прават подготовки за обезбедување повеќе место во болницата во Козле и за дополнителни капацитети на болницата „8 Септември“.