Министерот Филипче изјави дека се мобилизира здравствениот кадар и се прави план за зголемување на здравствени капацитети во интерните одделенија
Расте бројот на пациенти кои се хоспитализирани поради ковид-19. Министерството за здраство информира дека во последниве 24 часа, на Инфективната клиника примени се 18 нови пациенти. Вкупно се хоспитализирани 128 пациенти, од кои 90 пациенти се на кислородна поддршка.
Во болницата во Козле хоспитализирани се 5 деца и 6 мајки позитивни на ковид-19, 2 деца и 2 мајки суспектни на вирусот.
Во ГОБ „8 Септември“ има 3 приеми, а вкупно хоспитализирани се 45 пациенти. На респиратор се 2 пациенти.
Во болницата во Битола се хоспитализирани 49, а во болницата во Штип се 52 пациенти. На инфективните одделенија во Тетово, Охрид, Велес, Куманово, Прилеп, Гостивар, Струмица, Струга, Кочани и Кавадарци се хоспитализирани 286, позитивни и сомнителни на Ковид-19.
Вкупно во болниците низ земјава хоспитализирани се 575 пациенти позитивни или сомнителни на ковид-19.
Министерот за здравство Венко Филипче денеска изјави дека се мобилизира здравствениот кадар и се прави план за зголемување на здравствени капацитети во интерните одделенија за да може да се одговори на новиот бран на ковид-19.
На средбата со директорите на универзитетските клиники, клиничките и општите болници ширум државата се договориле да се направи дополнителна реорганизација на просторот за да има поголеми капацитети на интерните одделенија и да се оптимизира медицинскиот кадар на скопските клиники, кој потоа ќе биде активиран за помош на Инфективната клиника.