„Мојата изјава во текот на вчерашниот ден е базирана на тоа што е јавно изјавено од претставници на Владата, но исто така и од фактот дека тој легално си ја поминал границата меѓу Македонија-Косово“, вели лидерот на ДУИ во изјава за ТВ 21
Инаку, пред нешто повеќе од една недела актуелниот прв вицепремиер и министер за животна средина и просторно планирање, Изет Меџити, во гостување на албанската телевизија Ора њуз изјави дека Груби веќе не е во Косово, туку се наоѓа во Албанија. Меџити ваквите свои наводи избегна да ги потврди за домашните медиуми и кажа дека треба да се остави на Обвинителството и на Министерството за внатрешни работи да си ја работат работата
Лидерот на Демократската унија за интеграција (ДУИ), Али Ахмети, вели дека не ја знае актуелната локација на поранешниот висок партиски функционер и ексвицепремиер, Артан Груби, откако вчера за косовски медиум изјави дека ексвицепремиерот кој е во бегство е добар и се наоѓа на „албанските простори“.
По денешните реакции и барања што стигнаа од премиерот Христијан Мицкоски, но и од опозицискиот СДСМ тој да каже каде се наоѓа Груби, Ахмети во изјава за ТВ 21 тврди дека нема контакт со ексвицепремиерот.
За неговата вчерашна изјава вели дека била базирана на тоа што јавно било изјавено од претставници на Владата.
„Лично немам контакт со Артан Груби и немам детални информации каде актуелно се наоѓа. Мојата изјава во текот на вчерашниот ден е базирана на тоа што е јавно изјавено од претставници на Владата, но исто така и од фактот дека тој легално си ја поминал границата меѓу Македонија-Косово. Верувам силно дека секој граѓанин вклучувајќи го и господинот Груби заслужува еден правичен и неселективен судски процес далеку од селективна апликација на правото“,
изјавил Ахмети за ТВ 21.
Изјавата на Ахмети со која се дообјаснува следи по онаа што вчера ја дал за косовските медиуми, во која рекол оти Артан Груби во моментов се наоѓа на албанска територија.
Во изјавата, која ја пренесоа и медиумите во земјава, Ахмети вели дека Груби не избегал и дека ќе се врати во земјава, но за да се случи тоа, како што додава, правдата не треба да биде одмаздничка и селективна.
„Не сум го сретнал Артан Груби. Добар е, неговата локација е секако на албанските простори. Тоа е процес кој мора да има епилог. Тој не избега од Македонија, подготвен е да се појави пред органите на правдата, да ги почитува законите, но не и со одмаздничката и селективна правда“,
изјавил Ахмети, пренесува „Економиа онлајн“.
Прашан за коментар за вчерашната изјава на Ахмети, премиерот Христијан Мицкоски денеска изјави оти се надева дека таа ќе допре до Обвинителството и дека лидерот на ДУИ ќе биде повикан да даде одговор ако знае каде се наоѓа Груби, кого го ослови како бегалец од правдата.
„Се надевам дека ова допира до Обвинителството и има правна процедура во која ако имаме личност која знае каде се наоѓа бегалец од законот, ќе ја повика таа личност и таа ќе даде одговор на прашањето каде се наоѓа бегалецот од правдата. На секој во државата му е јасно како се поставуваа обвинители и судии во последните седум години. Истите тие без кои не можеше да биде поставен ниту обвинител, ниту судија, ниту да поминат квалификации преку Академијата на судии и јавни обвинители, сега велат дека правдата некому му била оневозможена и дека ова било политички прогон“,
изјави Мицкоски.
И од Социјалдемократскиот сојуз (СДСМ) денеска побараа од Обвинителството и од министерот за внатрешни работи Панче Тошковски да го повикаат лидерот на ДУИ, Али Ахмети, да даде исказ за да каже каде се наоѓа поранешниот прв вицепремиер Артан Груби, кој веќе две недели не е достапен за органите на прогонот.
„Откако лидерот на ДУИ застана во одбрана на Груби, повеќе од јасно е дека и самиот е информиран за тоа каде тој се наоѓа и има важни информации за случајот. Зошто Обвинителството и Тошковски не го повикаат Ахмети да даде изјава? Како е можно Ахмети и Меџити да знаат каде е Груби, а само Тошковски да е целосно незапознаен?“,
се вели во соопштението на СДСМ.
Инаку, пред нешто повеќе од една недела актуелниот прв вицепремиер и министер за животна средина и просторно планирање, Изет Меџити, во гостување на албанската телевизија Ора њуз изјави дека Груби веќе не е во Косово, туку се наоѓа во Албанија.
Меџити ваквите свои наводи избегна да ги потврди за домашните медиуми и кажа дека треба да се остави на Обвинителството и на Министерството за внатрешни работи да си ја работат работата.
Тој денеска преку објава на социјалната мрежи ја криткуваше вчерашната изјава на Ахмети, велејќи дека „албанскиот простор не е засолниште за корупмираните и нон-грата“ личности.
„Не го дампирајте албанскиот простор со печатот на корупцијата и не вклучувајте го во криењето на обвинетите за корупција и злоупотреба на службената… Личностите од ‘црниот список’ на САД не смеат да ги прават албанските држави заложници на правдата и да ги вклучуваат во нивните злоупотреби. Ова е срам за политиката и политичарите Албанци во Северна Македонија“,
вели Меџити.
Артан Груби и поранешниот директор на АД „Државна лотарија“, Перпарим Бајрами, се осомничени дека како соизвршители и одговорни лица во АД „Државна лотарија“, вршејќи ги своите посебни овластувања и должности, во 2023 година направиле штета на акционерското друштво со намера противправно да прибават буџетски средства на Лотарија во износ од над 8 милиони евра. Обвинителството ги сомничи за кривичното дело проневера во службата.
Кривичниот суд им одреди 30-дневен притвор, кој ќе почне да се спроведува по нивното обезбедување во земјата бидејќи во моментов не се достапни за органите на прогонот.
Против двајцата е распишана и меѓународна потерница.