Албанската опозиција вели дека поддржува легализација на објектите за домаќинствата, но не и амнестија на урбаните злосторства и легализација на објектите со кои се узорпира и уништува јавен имот.
Опозициската коалиција Алијансата за Албанците (АА) и Алтернатива ја поздравија одлуката на претседателот Стево Пендаровски да не го потпише указот за Законот за легализација на дивоградбите и да го врати во Собрание.
Македонската влада и опозиција, велат тие, се обидоа да прошверцуваат легализација на урбаните злосторства.
„Одлуката на Пендаровски уште еднаш го потврди она што ние како албанска опозиција го алармиравме од почетокот така и на денот на гласање на законот. СДСМ, ДУИ и ВМРО-ДПМНЕ се обидоа да се скријат зад граѓаните за да ги амнестираат урбаните злосторства на Стевче Јакимовски, Латас и другите соработници на сегашниот и претходниот режим. По оваа одлука, Законот треба да се врати во Собранието, да се разгледа во редовна постапка и со учество на сите надлежни тела и чинители. Овој Закон навистина мора да им служи на граѓаните и не смее да ги злоупотребуваат грижите на граѓаните за да им се служи на политичките криминалци на претходната власт како и на оние од сегашната власт“,
велат од АА и Алтернатива.
Тие додаваат дека поддржуваат легализација на објектите за домаќинствата, но не и амнестија на урбаните злосторства и легализација на објектите со кои се узорпира и уништува јавен имот.
Ветото на претседателот Пендаровски го поздравија и помалите партии кои се дел од владејачкото мнозинство, а кои не го поддржаа Законот, како ДОМ, ЛДП и Демократскиот сојуз.
Пендаровски денеска објави дека не го потпишал Указот на Законот за легализација на дивоградби, бидејќи го оценува како неуставен и спротивен на владеењето на правото и правната држава. Во образложението наведе дека Законот ги нарушува темелните вредности и поттикнува на непочитување на законите.