Кога во законодавниот дом како највисока институција во државата гледаат навреди, викање, закани, понижување и агресија без одговорност и последици, децата добиваат јасна порака дека насилството е дозволен начин за стекнување моќ, внимание и надмоќ над другиот, се наведува во реакцијата
Во време кога јавноста речиси секојдневно сведочи на булинг, физичко насилство, понижување и суровост меѓу децата и младите, секој што ја користи собраниската говорница мора да биде свесен за тежината на својата функција, велат од Мрежата за заштита од дискриминација. Потенцираат дека пратениците, министрите и другите носители на јавни функции не се само учесници во политичка пресметка , туку се јавни модели чие однесување децата го гледаат, усвојуваат и го повторуваат.
Мрежата за заштита од дискриминација најостро го осудува засилувањето на навредливиот и насилнички говор, како и насилството врз жените во политиката во Собранието.
„Децата не учат само од она што им го зборуваме, туку многу повеќе од она што го гледаат. Кога во законодавниот дом како највисока институција во државата гледаат навреди, викање, закани, понижување и агресија без одговорност и последици, тие добиваат јасна порака дека насилството е дозволен начин за стекнување моќ, внимание и надмоќ над другиот. Затоа, да не се чудиме кога истите модели ќе ги препознаеме во училишните ходници, на игралиштата и на социјалните мрежи“,
велат од Мрежата за заштита од дискриминација.
Фото: Архива
Од Мрежата за заштита од дискриминација посочуваат и дека причините за булингот не треба да се бараат само меѓу децата, семејствата и училиштата, додека најмоќните возрасни лица во државата, како што велат, јавно демонстрираат дека оној што е погласен, поагресивен и побрутален може да го замолчи и понижи другиот.
„Ако насилството во Собранието се прифаќа, премолчува или релативизира, тогаш какво однесување очекуваме од децата? Институциите го губат легитимитетот да бараат ненасилство од младите доколку самите го произведуваат, нормализираат и легитимираат насилството. Особено загрижува употребата на родово понижувачки квалификации кон жените во политиката, но и фактот што таквиот јазик го употребуваат и жените“,
додаваат од Мрежата за заштита од дискриминација.
Потсетуваат дека феминистичките организации со децении се бореа за повеќе жени во Собранието, Владата и на другите места на одлучување, со цел жените да бидат гласот на оние што се исклучени, да ги застапуваат потребите на сите жени и да внесат повеќе еднаквост, солидарност и одговорност во политиката.
„Не се бориме жените да добијат место во институциите за да го преземат најлошото од шовинистичката политичка култура и да го насочат кон други жени. Поголемата застапеност на жените не е само прашање на бројки. Таа треба да значи и поинаква политичка практика. Партиската припадност не може да биде оправдување за отсуство на женска солидарност и за учество во јавното понижување на жените“,
се наведува во реакцијата.
Граѓанските организации потсетуваат на Кодексот за етичко однесување кое неодамна го промовираше Собранието ,како „темел на новата парламентарна култура“. Во тој контекст , како што велат, Кодексот бара заемно почитување, аргументирана дебата и личен пример, забранува шовинистички јазик и обврзува говорот да не предизвикува омраза, нетрпеливост или насилство, вклучително и врз родова основа, а однесувањето што го сведочиме е во директна спротивност со принципите со кои Собранието јавно се пофали.
„Од сите избрани и именувани функционери, а особено од раководството на Собранието, бараме да бидат достоинствени претставници на граѓаните и да го сочуваат угледот на институцијата што се нарекува дом на граѓаните. Етичкиот кодекс не смее да биде уште еден документ за промоција и фотографирање. Дигнитетот на Собранието не се брани со свечени говори, туку со одговорност, постапување и последици за оние што го погазуваат“
се наведува во рекацијата.
Изминатиот период јавноста е сведок на вербални напади, навреди и понижувања во Собранието. Вчера пратеничката на опозицискиот Социјалдемократски сојуз (СДСМ) Јованка Тренчевска реагираше на изјавата на пратеничката на владејачката ВМРО-ДПМНЕ, Лидија Петкоска, која на комисиска расправа претходниот ден кажа дека нејзината колешка во Собранието „скокала како кокошка“.
„Во изминатиот период од премиерот гледаме изјави и навреди кон мои колеги и кон претседателот на СДСМ и кон пратениците. Очигледно колегите од мнозинство се охрабрени од својот претседател и ги продолжуваат навредите кон нас од опозицијата. Најтрагично е што неодамна го потпишавме и го промовиравме Етичкиот кодекс кој децидно забранува вакво однесување“,
реагираше Тренчевска.
Во понеделникот од пратеничката група на СДСМ соопштија дека министерот за локална самоуправа Иван Стоилковиќ за време на расправата за предлогот за реконструкција на Владата упатил навреди кон двајца нивни пратеници – Фатмир Битиќи и Митко Трајчулески.
Спасовски реагираше и на репликите на премиерот Христијан Мицкоски, кој, како што додаде, им се обраќа на пратениците нарекувајќи ги „мизогени“ и „палири“.
Во знак на револт, пратениците на СДСМ, ДУИ и Алијанса за Албанците ја напуштија седницата на која се избираа новите министри во рамки на владината реконструкција.
Премиерот Мицкоски се извини од собраниската говорница за случувањата во текот на денот и изрази надеж дека такви настани нема да се повторат.