Опозициските пратеници реагираа откако по паузата и координацијата со собранискиот спикер Африм Гаши било договорено, како што рекоа, да се донесе заклучок во кој ќе се осуди начинот на кој Стоилковиќ се однесувал и ги навредувал
Во знак на револт поради тоа што не добија извинување од кандидатот за министер Иван Стоилковиќ, пратениците на СДСМ , ДУИ и Алијансата за Албанците ја напуштија седницата на која треба да се изберат новите предлози за министри. Опозициските пратеници реагираа откако по паузата и координацијата со собранискиот спикер Африм Гаши било договорено, како што рекоа, да се донесе заклучок во кој ќе се осуди начинот на кој Стоилковиќ се однесувал и ги навредувал.
„Предложивме на координацијата да има заклучок во којшто ќе го осудиме, односно нема да го одобриме конкретно однесувањето на кандидатот за министер Иван Стоилковиќ, а не за сите присутни во салата. За ниту еден друг не е реагирано на таа координација. И од тој аспект рековме да направиме заклучок, претседателот да го прочита и тоа да биде излезната варијанта. Но, на ваше инсистирање вие рековте – не, јас ќе го соопштам тоа во име на владејачкото мнозинство.“ И сѐ е тоа во ред. И тоа требаше да го потенцирате, заради кого е проблемот“,
порача Оливер Спасовски од СДСМ.
Критики упатија и кон координаторот на пратеничката група на ВМРО-ДПМНЕ Никола Мицевски кој во обраќањето повика да се почитува Етичкиот кодекс и дебатата да се врати на темата за која е свикана седницата.
„Во име на парламентарното мнозинство, сакам јасно и гласно да кажам дека не одобруваме никакво однесување спротивно на принципите што ги заговаравме во етичкиот кодекс и согласно Деловникот за заштита на угледот и дигнитетот на Собранието од сите присутни во Собранието“,
рече Мицевски.
„Ти излезе тука, не го кажа тоа што требаше да го кажеш. Ти не си виновен во никој случај. Друг треба да побара извинување. Еднаш тој што доаѓа за министер треба да побара извинување што го направи цело ова, а потоа и премиерот“,
рече Рина Ајдари, пратеничка на ДУИ.
Пратеникот на Алијансата за Албанците, Халил Снопче, реагираше дека воопшто не биле повикани на координацијата и кажа дека ќе ја напуштат седницата затоа што не може да гарантира дека ќе се воздржат од реакција по, како што рече, пцостите од Стоилковиќ.
„Не можеме да ги смириме тензиите на овој начин. Меѓутоа, сепак, ние ќе дадеме еден мал придонес. Бидејќи, ако останеме на оваа седница со ова инсистирање да се продолжи дискусијата по оваа седница без јавно извинување од страна на Иван Стоилковиќ, тогаш не можеме да гарантираме дека ние ќе се воздржиме од какви било реакции. Бидејќи нема гаранција како ќе се однесуваме, замислете, опцуени сме, кандидат за министер нѐ опцу сите опозициски пратеници. Ние ќе дадеме самите придонес за да се смират страстите, ќе ја напуштиме од оваа седница“
рече Снопче.
Претседателот на Собранието Гаши даде пауза, по што најави продолжение на седницата за владина реконструкција.
Пратеничката група на Социјалдемократскиот сојуз (СДСМ) попладнево свика вонредна прес-конференција во Собранието, на која координаторот Оливер Спасовски соопшти дека кандидатот за министер за локална самоуправа Иван Стоилковиќ за време на расправата за предлогот за реконструкција на Владата упатил навреди кон двајца нивни пратеници, Фатмир Битиќи и Митко Трајчулески.
„Тоа претставува говор на омраза што може да роди насилство. И тоа што следеше по прекинување на седницата беше вистински напад, не само вербален од страна на кандидатот за министер Иван Стоилковиќ, кој се нафрли врз двајцата пратеници, не само физички, вербално, туку и со пцости. Мислам дека тоа не доликува на кандидат за министер, кој треба ова Собрание да го избере“
рече Спасовски на прес-конференцијата.