„Вчера имав многу добар разговор со претседателот (Володимир) Зеленски и со претседателот (Владимир) Путин, и мислам дека можеби можеме да направиме нешто на тоа поле. Навистина го мислам тоа. Мислам дека двајцата се отворени за такво нешто“, изјави Трамп за новинарите во Франција, каде што присуствува на самитот на земјите од Г7
Американскиот претседател Доналд Трамп, кој им се придружи на глобалните лидери на самитот на Г7 во Франција, соопшти дека сега ќе се обиде да ги посредува во прекин на борбите во Украина и Либан, по објавата дека е постигнат прелиминарен договор за прекин на војната со Иран, пренесоа светските медиуми.
Откако го обезбеди договорот со Иран, Трамп рече дека сега ќе го насочи своето внимание кон обидот за посредување во мир меѓу Украина и Русија, а истовремено ќе се обиде да ги прекине и борбите во Либан.
„Вчера имав многу добар разговор со претседателот (Володимир) Зеленски и со претседателот (Владимир) Путин, и мислам дека можеби можеме да направиме нешто на тоа поле. Навистина го мислам тоа. Мислам дека двајцата се отворени за такво нешто“,
изјави Трамп.
На самитот во одморалиштето Евиан-ле-Бен во Франција, Трамп треба да присуствува на работен состанок со украинскиот претседател Зеленски, чии односи со американскиот претседател се подобрија по тензичната прва средба меѓу нив во Овалната соба минатата година.
Според аналитичарите, рускиот напредок на фронтот во Украина е забавен и доживува неуспеси, додека во меѓувреме Украина бара повеќе финансиски средства од своите сојузници за својата одбрана по серијата руски напади врз Киев.
Зеленски вчера изјави дека понудил средба со рускиот претседател Путин на самитот на Г7 за да разговараат за завршување на војната, но Путин не бил подготвен за разговор.
Во меѓувреме останува отворено прашање дали Зеленски ќе може да добие поголема американска поддршка бидејќи Трамп дава приоритет на финализирањето на конфликтот со Иран, кој му го наруши домашниот рејтинг.
Како што наведуваат дел од светските медиуми, обезбедувањето гаранции од Трамп би можело да биде тешко бидејќи голем дел од лидерите на земјите од Г7, според аналитичарите, го сметаат за нестабилен партнер поради неговите еднострани и непредвидливи одлуки, кои предизвикаа криза на Блискиот Исток, ги нарушија глобалната трговија и дипломатијата, а предизвикаа и преиспитување на посветеноста на Соединетите Држави под негово водство кон глобалниот поредок воспоставен од САД по Втората светска војна.
Последиците од војната во Украина и на Блискиот Исток се само едно од неколкуте прашања за кои лидерите на земјите од Г7 ќе расправаат на самитот во Франција, кој почна вчера, а ќе трае до утре – 17 јуни. Лидерите, исто така, ќе бараат заедничка основа за решавање на економската нерамнотежа во светот, алтернативи за набавка на клучни минерали од Кина, како и за прашањата поврзани со развојот на вештачката интелигенција.