„Економскиот и социјалниот совет на ОН има 54 членки, а секоја година се избираат 18 нови членки за мандат од три години. Тоа е рутинска процедура во рамките на Обединетите нации, а не некој посебен дипломатски подвиг“, коментираат од СДСМ откако МНР вчера објави дека земјава е избрана за членка на ЕКОСОК во период од 2027 до 2029 година
Изборот на Македонија во Економскиот и социјален совет на Обединетите нации (ЕКОСОК) е претставен од Владата како историски успех и голема дипломатска победа, а всушност е рутинска работа – коментираат од опозицискиот СДСМ откако Министерството за надворешни работи и надворешна трговија вчера објави дека земјава е избрана за членка на ЕКОСОК за мандатниот период од 2027 до 2029 година.
„ЕКОСОК има 54 членки, а секоја година се избираат 18 нови членки за мандат од три години. Тоа е рутинска процедура во рамките на Обединетите нации, а не некој посебен дипломатски подвиг“,
велат од СДСМ и додаваат дека членството на земјава во ова тело е резултат на долгорочна дипломатска работа која ја воделе повеќе влади, а не само актуелната.
Оттука, опозиционерите оценија дека Владата води пиар-пропаганда во отсуство на реални резултати.
„Наместо да се фокусира на вистинските приоритети, Владата се обидува да создаде илузија на некаков голем успех преку рутински дипломатски активности. Вистински успех за Македонија би бил почеток на преговорите со ЕУ. Тоа би значело реално отворање на можностите, нови инвестиции, подобар животен стандард и перспектива за младите. Наместо тоа, граѓаните добиваат тригодишен мандат во една комисија на ОН и пропагандна кампања“,
коментираат од партијата на Венко Филипче.
Министерството за надворешни работи и надворешна трговија вчера објави дека земјава е избрана за членка на Економскиот и социјален совет на Обединетите нации (ЕКОСОК) за мандатниот период 2027–2029 година, притоа оценувајќи го изборот како историски успех за македонската дипломатија бидејќи првпат од независноста државата ќе биде членка на едно од главните тела на системот на Обединетите нации.