Причина за одложување на денешното рочиште, како што информирал судијата Јордан Велковски, било отсуството на бранителот на обвинетиот Артан Етеми, адвокатот Самоил Филиповски. Следното рочиште, кога се очекува да започне новото судење, судијата го закажал за 5 ноември
Во Основниот суд во Тетово и денеска не почна судскиот процес против поранешните директори на локалната Клиничка болница, Флорин Бесими и Артан Етеми, на кои одново им се суди за пожарот во тетовската модуларна болница пред три години откако Апелацискиот суд Гостивар укина дел од првичната пресуда и предметот го врати на повторно судење.
Новото судење за двајцата ексдиректори на тетовската Клиничка болница требаше да почне на 26 јуни, но рочиштето беше одложено за денеска (25 септември) бидејќи тогаш во судницата не беа присутни претставници на Клиничката болница која е обвинета како правно лице.
Причина за одложување на денешното рочиште, пак, како што информирал судијата Јордан Велковски било отсуството на бранителот на обвинетиот Етеми, адвокатот Самоил Филиповски, пренесе МИА.
Следното рочиште, кога се очекува да започне новото судење, судијата го закажал за 5 ноември.
Модуларната болница во Тетово која беше отворена за згрижување и лекување пациенти болни од ковид-19 изгоре вечерта на 8 септември, а во трагедијата животите ги загубија 14 лица. Од загинатите, 12 беа на болничко лекување, додека за двајца беше утврдено дека се членови на семејствата на дел од згрижените пациенти.
За случајот им се судеше на двајцата поранешни директори на тетовската болница Флорин Бесими и Артан Етеми за кривичното дело тешки дела против општата сигурност, а докторот Бобан Вучевски беше обвинет за непостапување по здравствени прописи.
Судењето почна на 4 декември 2022 г. и по шест месеци на 5 јуни лани Основниот суд Тетово донесе првостепена пресуда
Обвинетите директори тогаш добија условни казни од една година и шест месеци, додека докторот Вучевски беше ослободен од обвинението.
На Клиничката болница ѝ беше изречена парична казна од еден милион денари. На изрекувањето на пресудата во тетовскиот суд судијата рече дека тоа не било судење за причините за пожарот.
На 10 јули лани Основното јавно обвинителство поднесе жалба на првостепената пресуда по која расправаше Апелацискиот суд во Гостивар.
Во април годинава второстепениот суд донесе одлука со која наложи да има повторно судење за поранешните директори на тетовската болница, како и за самата болница, како правен субјект. За докторот Бобан Вучевски, Апелацискиот суд ја одби жалбата на Обвинителството и ја потврди првостепената ослободителна пресуда.
За одговорноста во врска со причините за пожарот досега не одговараше никој оставајќи ги семејствата на загинатите без одговори и со чувство на револт.
Во октомври 2021 г. по вештачењето на МВР, Обвинителството информира дека пожарот во модуларната настанал како последица на запален продолжен кабел, на кој бил приклучен дефибрилатор – апарат за реанимација, полнач за мобилен телефон и уште еден уред.
Истражувачката репортерска лабораторија (ИРЛ) лани во август објави документарен филм со наслов „Убиство во Тетово“, во кој изнесе сознанија и наводи за пропусти во изградбата на модуларната болница, што повторно го распламти „огнот“ за трагедијата во модуларната болница.
На 8 септември лани, на двегодишнината од трагедијата, беше одржан јавен марш и протест пред судот во Тетово во организација на семејствата, а седум дена подоцна марш и протест беа организирани и во Скопје на плоштадот „Скендербег“, а кој заврши пред зградата на Јавното обвинителство.