За Гоце Делчев не се преговара, тој е државата Македонија, ги коментираше лидерот на ВМРО-ДПМНЕ, Христијан Мицкоски, последните случувања на релација Скопје-Софија во настап на ТВ „Алфа“.
„Јас не можам да разберам да раговараме и да преговараме што бил Гоце Делчев и не можам да го разберам претседателот на нашата држава кој што вели дека Гоце Делчев бил Бугарин. Ние државата ја темелиме на тоа име, тоа не е за разговори, тоа не е предмет на преговори. Гоце Делчев е државата Македонија. Тоа е исто како да им кажете на Турците што бил Кемал Ататурк. Тоа се работи за кои не се разговара. Ова држава постои за тоа име, сме го избрале како народ тоа име и сме ја формирале оваа држава“,
рече Мицкоски.
Лидерот на ВМРО-ДПМНЕ вели дека никој не може да го убеди дека Гоце Делчев бил нешто поинакво од Македонец.
„Можеби во некои минати времиња не толку често се споменувале Татарчев, Протугеров или други јунаци. Но, Гоце Делчев секогаш бил нишката околу која македонскиот народ и граѓаните на оваа држава без разлика дали биле Албанци, Македонци, Турци, Роми, Власи се собирале и ја граделе оваа држава“,
рече Мицкоски.
Според него, за ова не треба да се помисли да се преговара.