Во пресрет на лидерскиот состанок посветен на Планот за раст на Западен Балкан, верувам дека ќе реализираме плодоносна средба, со што ќе ја зацврстиме успешната реализација на евроинтеграцијата на нашата држава и регионот на Западен Балкан до 2030 година, вели Маричиќ при пречекот на помошник-државниот секретар за Европа и Евроазија, Џејмс О’Брајан
О’Брајан, кој на крајот на ноември минатата година беше во Скопје, во интервју за „360 степени“ на МРТ 1, кое беше прво за македонски медиум, одговарајќи на прашањето што понатаму со оглед на тоа што е извесно дека овој парламент нема да ги усвои уставните измени, рече дека без да коментира дали работите би се случиле сега или подоцна, јасно е дека има понуда на маса и ако некој вели дека има подобра понуда, но не кажува за што точно станува збор, само се обидува да измами
Лидерскиот состанок посветен на Планот за раст за Западен Балкан што ќе се одржи во Скопје е повод за шефот на Одделот за координација на санкциите при Стејт департментот на Соединетите Американски Држави и именуван помошник-државен секретар за Европа и Евроазија, Џејмс О’Брајан, денеска да пристигнe во земјава по повод неговото учеството на состанокот.
Добредојде на О`Брајан во Скопје му посака вицепремиерот Бојан Маричиќ кој му се заблагодари за поддршката што Соединетите Американски Држави ѝ ја даваат на Северна Македонија.
Помошник-државниот секретар О`Брајан е дел од Делегацијата на стратешките партнери на државата кои ќе учествуваат на лидерскиот состанок посветен на Планот за раст за Западен Балкан на Европската комисија, чијшто домаќин е Владата на Република Северна Македонија, вечерва и утре во Скопје.
„Поддршката на САД кон Северна Македонија доаѓа секогаш во вистинско време, за што сме исклучително благодарни. Сојузништвото и соработката со САД кои траат со децении се клучни за нашата стабилност и за напредокот на патот до нашето членство во ЕУ. Во пресрет на лидерскиот состанок посветен на Планот за раст на Западен Балкан, верувам дека ќе реализираме плодоносна средба со што ќе ја зацврстиме успешната реализација на евроинтеграцијата на нашата држава и регионот на Западен Балкан до 2030 година“,
рече вицепремиерот Маричиќ.
Во пресрет на лидерската средба посветена на Планот за раст на Западен Балкан, од Секретаријатот за европски прашања (СЕП) нагласуваат дека нашата држава ја има честа да ги поврзува сите учесници, делегациите на земјите од регионот и со тоа да ја покажеме нашата сериозна посветеност кон евроатлантската интеграција, развивање и просперитет на државата и на регионот, наведуваат од СЕП.
Откако во октомври ја презеде функцијата помошник-државен секретар на САД за Европа и Евроазија, Џејмс О’Брајан, во интервју за „360 степени“ на МРТ 1, кое беше прво за македонски медиум, одговарајќи на прашањето што понатаму со оглед на тоа што е извесно дека овој парламент нема да ги усвои уставните измени, рече дека без да коментира дали работите би се случиле сега или подоцна, јасно е дека има понуда на маса и ако некој вели дека има подобра понуда, но не кажува за што точно станува збор, само се обидува да измами.
На прашањето дали има шанса за интервенции во Преговарачката рамка на ЕУ или промени во глобалниот контекст, кога некој вели дека може да донесе подобра понуда, О’Брајан даде негативен одговор.
„Видете, има понуда на маса. И ако сакате да знаете за некого кој е и како ќе постапува кога ќе биде на власт, видете како ќе реагира на таа понуда. Ако тие велат, на многу јасен начин, еве ја алтернативата и верувам дека таа е прифатлива за другите, тогаш можете да процените дали се во право или не. Ако велат – имам подобра понуда, но нема сега да ти кажам што е – тоа е личност од која не би купиле автомобил. Па, мислам и дека не би требало да гласате за нив, исто така. Но, тоа е избор кој го прават гласачите овде. Јас не гласам овде. Луѓето може да изберат што сакаат“,
додаде тој.
Додека беше во С Македонија, О’Брајан имаше пријателската средба и со претседателот на ВМРО-ДПМНЕ, Христијан Мицкоски, и потпретседателите Владо Мисајловски и Тимчо Муцунски.
Од партијата повторија дека ВМРО-ДПМНЕ нема да прифати бугарски диктат ниту сега ниту во иднина.
„Подготвени сме веднаш по формирањето на новата влада предводена од ВМРО-ДПМНЕ да седнеме со бугарската влада и како соседи да разговараме за реалноста и за фактите поврзани со реалноста. Што се однесува до прашањето за кого и како треба да гласаат македонските граѓани, одговорот е јасен, а уште појасен ќе биде за неколку месеци од денес кога ВМРО-ДПМНЕ ќе добие поддршка од огромно мнозинство македонски граѓани, бидејќи граѓаните не гласаат само за едно прашање за коешто ставот е јасен, туку гласаат за понудата кадровска и програмска“,
рекоа тогаш од ВМРО-ДПМНЕ.