Со пресудата на Управниот суд, со која се поништи одлуката за разрешувањето на претседателката Весна Дамева, како што посочуваат од Судскиот совет, не се доведува во прашање законитоста на одлуките донесени од Советот како колективно тело бидејќи со неа единствено се поништува решението за разрешување на сегашната претседателка
Сите одлуки што Судскиот совет ги има донесено во периодот по разрешувањето на претседателката Весна Дамева, а на кои стои потписот на Сашко Георгиев, кој во тој период беше на претседателската функција, се во правна сила.
За ова денеска преку писмено соопштение информираа од Судскиот совет откако во јавноста се наметна дилемата дали одлуките потпишани од сега веќе поранешниот претседател Сашко Георгиев се легитимни. Прашањето се наметна по пресудата на Управниот суд со која се поништи разрешувањето на Весна Дамева од чело на Советот, кое од Судот беше оценето како незаконито и без образложение.
Со ваквата пресуда од Управниот суд, како што посочуваат од Судскиот совет во денешното соопштение, не се доведува во прашање законитоста на одлуките донесени од Советот како колективно тело бидејќи со неа единствено се поништува решението за разрешување на сегашната претседателка.
„Во врска со вчерашните изјави во јавноста со кои се отвораат дилеми околу ништовноста на сите акти донесени во периодот од изборот на Сашко Георгиев за претседател на Судскиот совет на РСМ до моментот на давањето на негова оставка, а во врска со донесената правосилна и извршна пресуда на Управниот суд, Судскиот совет има потреба да се произнесе со став дека сите акти донесени во овој период се во правна сила. Со пресудата на Управниот суд не се доведува во прашање законитоста на одлуките донесени од Судскиот совет како колективно тело, бидејќи се поништува решението за разрешување на сегашната претседателка“,
се наведува во денешното соопштение на Судскиот совет.
Спротивен на Судскиот совет, по однос на ова прашање, е ставот на невладините организации.
Според Коалицијата „Сите за правично судење“, ништовноста на одлуката за разрешување на Весна Дамева ги прави ништовни и сите дела, права и обврски засновани врз ништовниот акт, меѓу другото, и одлуката за избор на нов претседател на Советот. Дополнително, како што посочуваат, пресудата на Управниот суд со себе повлекува и ништовност на сите одлуки донесени во периодот по смената на Дамева од претседателската позиција во Советот и покрај тоа што одлуките се носени со мнозинство гласови.
„Секако дека одлуките се донесени од страна на Советот со мнозинство, меѓутоа овластениот потписник којшто ги има потпишано истите одлуки е Сашко Георгиев како претседател на Судскиот совет. Меѓутоа по одлуката на Управниот суд со тоа што беше констатирано незаконско разрешување и беше поништена таа одлука за незаконското разрешување стануваат ништовни понатаму и сите оние одлуки коишто биле донесени во смисла на одлуката за избор на новиот претседател, односно Сашко Георгиев. Така што станува збор за тоа дека во тој момент претседателот на Судскиот совет не бил овластен претставник и овластен потписник на одлуките на Судскиот совет коишто биле носени“,
рече во изјава за ТВ Телма, Ивана Петковска, од Коалицијата „Сите за правично судење“.