Лидерите на ЕУ, ОН и НАТО денеска реагираа на нападите на палестинската екстремистичка организација Хамас врз Израел и во своите соопштенија ги осудија нападите, повикаа на воздржаност и избегнување цивилни жртви
Лидерите на ЕУ и ОН, како и НАТО денеска реагираа на нападите на палестинската екстремистичка организација Хамас врз Израел и во своите соопштенија ги осудија нападите. Тие повикуваат на воздржаност и избегнување на цивилни жртви.
НАТО ги осуди „терористичките напади на Хамас врз партнерот на НАТО, Израел“, изјави портпаролот на Алијансата.
„Силно ги осудуваме денешните терористички напади на Хамас врз партнерот на НАТО #Израел. Нашите мисли се со жртвите и сите засегнати. Тероризмот е фундаментална закана за слободните општества, а Израел има право да се брани“,
изјави портпаролот Дилан Вајт.
We strongly condemn today’s terrorist attacks by Hamas against NATO partner #Israel. Our thoughts are with the victims and all those affected. Terrorism is a fundamental threat to free societies, and Israel has the right to defend itself.
— Dylan White (@NATOpress) October 7, 2023
Претставникот на ОН за Блискиот Исток, Тор Венесланд, ги осуди нападите врз Израел и предупреди дека тоа е „опасна бездна“, повикувајќи ги сите да се „повлечат од нејзиниот раб“. Тој повика на максимална воздржаност и апелираше до сите страни да ги заштитат цивилите.
Високиот комесар на ОН за човекови права Фокер Турк повика на итен прекин на насилството во Газа. Турк рече дека е шокиран од извештаите дека стотици ракети биле истрелани врз Израел и информациите дека израелски цивили биле земени како заложници.
„Цивилите никогаш не смеат да бидат цел на напади“,
додаде Турк.
Тој го повика Израел да преземе мерки за да спречи цивилни жртви кога ќе возврати со воздушни напади во правец на Газа.
Шефот за надворешна политика на ЕУ, Жозеп Борел, рече дека ги следи вестите што доаѓаат од Израел.
„Недвосмислено ги осудуваме нападите на Хамас. Итна потреба за прекин на непријателствата, деескалација, ослободување на заложниците и преговори. ЕУ цврсто ги осудува сите форми на тероризам“,
напиша Борел на мрежата „Икс“.
Calls with @MfaEgypt @AymanHSafadi @FaisalbinFarhan @arableague_gs on ongoing attacks by Hamas against Israel.
— Josep Borrell Fontelles (@JosepBorrellF) October 7, 2023
Urgent need for cessation of hostilities, deescalation, full respect for IHL, liberation of hostages & negotiations. The EU firmly condemns all forms of terrorism.
Претседателката на Европската комисија, Урсула фон дер Лајен, оцени дека нападот во Израел е тероризам во најновиот облик.
„Недвосмислено го осудувам нападот на терористите на Хамас врз Израел. Израел има право да се брани од такви грозоморни напади“,
напиша таа на мрежата „Икс“.
I unequivocally condemn the attack carried out by Hamas terrorists against Israel.
— Ursula von der Leyen (@vonderleyen) October 7, 2023
It is terrorism in its most despicable form.
Israel has the right to defend itself against such heinous attacks.
Турскиот претседател Реџеп Таип Ердоган денеска ги повика Израелците и Палестинците да покажат воздржаност за да не се влоши ситуацијата.
„Ги повикуваме сите страни да се воздржат од агресивни дејствија“,
рече Ердоган.
Францускиот претседател Емануел Макрон исто така реагираше на последната криза и остро ги осуди терористичките напади врз Израел.
„Изразувам целосна солидарност со жртвите и нивните семејства“,
објави тој на платформата „Икс“.
Либанската група Хезболах, поддржана од Иран, објави соопштение во кое вели дека внимателно ја следи ситуацијата во Газа и дека е во директен контакт со раководството на палестинскиот отпор.
Рускиот заменик-министер за надворешни работи Михаил Богданов изјави дека Москва е во контакт со Израел, Палестинците и арапските земји во врска со ескалацијата на израелско-палестинскиот конфликт.
„Се подразбира дека секогаш повикуваме на воздржаност“,
рече Богданов.
Украинскиот претседател Володимир Зеленски го осуди терористичкиот напад врз Израел и рече дека правото на една земја да се брани не може да биде доведено во прашање.
Германскиот премиер Олаф Шолц изјави дека Германија ги осудува нападите на Хамас и стои со Израел.
„Денеска добиваме застрашувачки вести од Израел. Длабоко сме шокирани од ракетниот истрел од Газа и ескалацијата на насилството“,
вели Шолц.
Министерството за надворешни работи на Саудиска Арабија повика на „итен прекин на насилството“ меѓу Израел и Палестинците, објави државната новинска агенција.
„Ги следиме настаните без преседан меѓу многубројните палестински фракции и израелските окупаторски сили кои доведоа до високо ниво на насилство на многу фронтови“,
се вели во соопштението на Министерството.
Египетското Министерство за надворешни работи предупреди на „тешки последици“ од ескалацијата на тензиите меѓу Израел и Палестинците, се вели во соопштението на министерството.
Британскиот министер за надворешни работи Џејмс Клеверли рече дека земјата секогаш „ќе го поддржува правото на Израел да се брани“.
„Велика Британија недвосмислено ги осудува ужасните напади на Хамас врз израелските цивили“,
рече Клеверли.
Зборуваше и вршителот на должноста министер за надворешни работи на Шпанија, Хозе Мануел Албарес, кој ги осуди нападите од Газа насочени против Израел.
„Силно ги осудуваме многу сериозните терористички напади од Газа насочени кон Израел“,
објави Албарес на социјалната мрежа „Икс“.
Хрватскиот премиер Андреј Пленковиќ ги осуди „терористичките напади врз цивили“ во Израел кои се „шокантни и неприфатливи“ и рече „Хрватска стои во солидарност со Израел и неговиот народ“.
Министерот за надворешни работи Гордан Грлиќ Радман, исто така, „остро ги осуди масовните терористички напади врз Израел и насилството врз невините луѓе“ на „Икс“.
„Ние стоиме во солидарност со Израел и повикуваме на итна деескалација“,
додаде тој.
Претседателот на Србија, Александар Вучиќ, ги осуди денешните ненадејни терористички напади врз Израел, истакнувајќи дека денеска повеќе од кога било потребно е Израелците и Палестинците заедно да му се спротивстават на насилството.
„Ги осудуваме страшните напади врз Израел. Низ историјата, еврејскиот народ преживеал големи страдања и затоа Израел заслужува мирен и безбеден живот. Денес, повеќе од кога било досега, на светот му требаат Израелците и Палестинците да му се спротивстават на насилството“,
напиша Вучиќ на својот профил на мрежата „Икс“.