„Имаме кратки рокови таму каде што не е настапена застареноста, тоа експресно да се заврши. Од друга страна, ресурсите се такви какви што се, не ни се унапредени состојбите. Секако, во однос на предметите во кои сме вложиле многу ресурси и енергија веќе тие предмети ни застаруваат, голем дел од нив. Во тек, барем за предметите во кои јас постапувам, е анализа да видиме точно која ќе биде импликацијата на овие измени на Кривичниот законик, меѓутоа, самите измени како такви јас лично ги доживувам како навреда за сите професионалци кои сме се вложиле во борбата, пред сè против корупцијата, бидејќи овие измени најчесто ќе ги афектираат коруптивните кривични дела“, изјави денеска обвинителката Ленче Ристоска
За обвинителката Ленче Ристоска новите измени на Кривичниот законик се навреда за сите професионалци кои, како што вели, се вложија, пред сè во борбата против корупцијата.
Обвинителката својот личен став, за измените во Кривичниот законик кои во изминативе недели се во фокусот на јавноста, во еден или во друг контекст, го изнесе одговарајќи на новинарски прашања по првиот панел од конференцијата на тема „Зајакнување на жените и младите во борбата против корупцијата и во вградувањето на европските фундаментални права и вредности во регионот“.
Овие измени, кои Владата ги утврди „тајно“ и беа експресно изгласани од Собранието по скратена постапка со европско знаменце, според Ристоска, најчесто ќе ги афектираат коруптивните кривични дела бидејќи голем дел од предметите во кои се вложени многу ресурси и енергија веќе застаруваат.
Според обвинителката, измените на Кривичниот законик, и тоа како влијаат на културата на неказнивост, која, како што вели, некако се протежира во изминатите години.
„И обвинителството по мое мислење е ставено пред една навистина една неблагодарна и тешка задача. Имаме кратки рокови таму каде што не е настапена застареноста, тоа експресно да се заврши. Од друга страна, ресурсите се такви какви што се, не ни се унапредени состојбите. Секако, во однос на предметите во кои сме вложиле многу ресурси и енергија веќе тие предмети ни застаруваат, голем дел од нив. Во тек, барем за предметите во кои јас постапувам, е анализа да видиме точно која ќе биде импликацијата на овие измени на Кривичниот законик, меѓутоа, самите измени како такви јас лично ги доживувам како навреда за сите професионалци кои сме се вложиле во борбата, пред сè против корупцијата, бидејќи овие измени најчесто ќе ги афектираат коруптивните кривични дела“,
вели Ристоска.
Во врска со прашањето дали постои излезна варијанта, во смисла на преквалификација на делата или продлабочување на истрагите за да се дојде до друго кривично дело, обвинителката рече дека ќе се преземе сè што се може за да се извлече максимум.
„Можам да зборувам од моја перспектива и тоа како јас би постапила. Во секој случај, ќе преземеме сè што може да се извлече максимум. Зборувам за оние предмети каде што веќе има судење. За истрагите коишто се во тек и предметите коишто веќе не се на судење, се разбира истрагите ќе опфатат и дополнителни сегменти. За предметите кои веќе се на судење, да, некаде ќе мора да се извршат преквалификации, да се види да се извлече максимум од ситуацијата“,
рече Ристоска.
Во тој контекст таа подвлече дека не треба да заборавиме дека кои било измени со кои некој можеби се спасува од кривична одговорност не ја изземаат од одговорност имотната корист.
„Односно конфискацијата и понатаму останува во сила, па најмалку што можеме да направиме во судските предмети каде што имаме можност е да се бориме да се спроведе конфискацијата“,
кажа обвинителката.
Надоврзувајќи се на делот со конфискацијата, обвинителката рече дека се потребни измени на некои законски решенија за таа да заживее, согласувајќи се притоа со забелешките дека во моментов е полужива.
„Разбирам дека имаме проблеми во делот на конфискација, но јас ја подвлекувам обврската на Обвинителството да направи сè што е можно да го обезбеди имотот и понатака да го конфискува во корист на државата, а самото спроведување таму каде што веќе се детектирани проблеми верувам дека треба и подобра меѓуинституционална соработка, па дури и политичка волја за измена на некои законски решенија, со цел конфискацијата да заживее бидејќи, да, се согласувам некако ни е полужива во моментов“,
рече обвинителката Ленче Ристоска.