На прашањето како планираат да ја пробијат блокадата на ВМРО-ДПМНЕ во однос на уставните измени во следните неколку седмици, Ковачевски не даде конкретен одговор, но повтори дека ова прашање како никогаш досега е од стратешки интерес како за Северна Македонија, така и за ЕУ, во светло на геополитичките случувања во Европа со војната во Украина
Утре во Атина премиерот Димитар Ковачевски ќе има формален состанок со претседателката на Европската комисија, Урсула фон дер Лајен, на кој ќе ја информира за текот на уставните измени. Состанокот ќе се одржи за време на посетата на Ковачевски на Атина, кој ќе отпатува на неформалната средба што ја организира грчкиот премиер Киријакос Мицотакис за лидерите од Западен Балкан.
Средбата со Фон дер Лајен вечерва ја најави премирот Ковачевски за време на неговото гостување во „Тема на денот“ на ТВ Сител.
„Претседателката на ЕК од прва рака ќе може да се информира од мене за текот на уставните измени, иако таа веќе ги има сите информации, и пред одржувањето на седницата во однос на поднесувањето, дека процесот започна, дека започна со 73 гласа за изгласување на дневниот ред во однос на уставните амандмани, и оти стана многу јасно дека СДСМ и Коалицијата, европската коалиција, се за продолжување на европската интеграција на Северна Македонија, меѓутоа дека опозицијата повторно, како што било и во минатото, е за блокада на патот на Северна Македонија во европските интеграци, исто како што беше и против залченувањето на Северна Македонија и во НАТО“,
рече Ковачевски.
Според него, Собранието има капацитет да донесе уште една голема стратешка одлука за граѓаните на државата, пред сѐ за иднината на граѓаните, со која, како што рече, ќе го започнеме отворањето на кластерите, по успешното завршување на скрининг-процесот и до 2030 година државата да стане членка на ЕУ.
На прашањето како планираат да ја пробијат блокадата на ВМРО-ДПМНЕ во однос на уставните измени во следните неколку седмици, Ковачевски не даде конкретен одговор, но повтори дека ова прашање како никогаш досега е од стратешки интерес како за Северна Македонија, така и за ЕУ, во светло на геополитичките случувања во Европа со војната во Украина.
„Тоа е едно од прашањата кои се високо на агендата и за САД. И не случајно тука беше еден од нивните најпроминентни сенатори, Марфи. Потоа имав средба со државниот секретар Блинкен, и не случајно и претседателката на ЕК и на ЕС и голем број претседатели и премиери имаа говор во нашето Собрание. Што значи дека се работи за заеднички стратешки интерес, како ретко кога досега. И првпат досега се случува ветото за нашата држава да не доаѓа од надвор, туку да доаѓа од внатре, и тоа од истите луѓе од кои секогаш имало блокади“,
рече Ковачевски.
Ковачевски рече дека ова е почеток на процесот, каде што можеа да се видат ставовите на политичките партии.
„Интересно е што ВМРО-ДПМНЕ реши да не определи свој пратеник од политичката партија да ги изнесе нивните ставови, туку ставовите на нивната пратеничка група и коалицијата ги изнесе независен пратеник, што, исто така, остава простор да се разговара нормално на сите нивоа со ВМРО-ДПМНЕ, со цел да се убедат дека сега е моментот да се донесе оваа важна одлука, бидејќи сега е годината кога прво – можеме да ја одржиме Втората меѓувладина конференција и второ – е пред изборите во ЕУ идната година“,
рече Ковачевски.
Ковачевски уште еднаш повтори дека лидерот на ВМРО-ДПМНЕ, Христијан Мицкоски, сака да потрошиме 20 години во чекалната на ЕУ и дека тоа потсетува на Груевски.
„Некој за лична кариера сака да држи заложник цела држава. На Мицкоски му се седи во чекалната на ЕУ, 10, 20 години, а тоа многу ме потсетува на неговиот претходник Груевски, кој сакаше да седи во чекалната 10, 20 години, но денеска живее во земја членка на ЕУ“,
рече Ковачевски.
Ковачевски додаде дека 80 отсто од граѓаните сакаат да бидат дел од ЕУ и додаде дека ВМРО-ДПМНЕ иако биле против Договорот со Грција, сега воопшто не го споменуваат и дека со опозицијата ризикот е секој напредок досега да биде загрозен.