Таа посочи дека досега не била повикана да даде дополнителен исказ по демолирањето на нејзиниот автомобил. И поради тоа таа не верува дека случајот ќе се реши
Портпаролката на ВМРО-ДПМНЕ, Марија Митева, бара институциите да постапат во случајот со демолирањето на нејзиниот автомобил и да ги најдат сторителите.
Таа посочи дека за секој ваков чин треба да се покрене соодветна постапка, соодветна истрага – како што слушнала дека е постапено во случајот со автомобилот, кој се поврзува со првиот вицепремиер Артан Груби.
„Факт е дека таквите состојби предизвикуваат чувства на небезбедност и тоа е она што јас и моето семејство го почувствуваме. Меѓутоа од друга страна не би сакала да влезам во играта на жртва, и да собирам било какви симпатии од граѓаните поради нешто што ми се случило, поради работата што ја работам. Ваквите состојби само покажуваат колку власта е во паника и колку навистина го губат тлото под нозете. Ова се сериозни состојби за кои што јас очекувам дека институциите ќе постапат и ќе ги најдат сторителите. Зошто го кажувам ова? Јас го следев и интервјуто на Артан Груби после настанот кој што му се случи нему со возилото, кој што отвори дополнително други прашања за кои што уште немаме одговор, меѓутоа тој на тоа интервју трипати ревносно се заблагодари на безбедносните институции, на МВР, на АНБ и на сите останати институции. И тоа покажува колку третманот на граѓаните во Македонија не е еднаков“,
рече Митева при гостување во емисијата „Заспиј ако можеш“ на ТВ Алфа.
Таа посочи дека досега не била повикана да даде дополнителен исказ по демолирањето на нејзиниот автомобил. И поради тоа таа не верува дека случајот ќе се реши.
Митева пред два дена на својот фејсбук-профил објави дека го затекнала својот автомобил искршен и демолиран.
Од СДСМ го осудија настанот и ги повикаа надлежните институции да го расчистат случајот, а сторителите да бидат откриени и да понесат одговорност согласно законите.
Викендот се случи сличен инцидент. Имено, повеќе медиуми објавија дека во скопската населба Чаир било запалено возилото на првиот вицепремиер Артан Груби. Во полиција инцидентот го пријавил Б. Л., кој се води како сопственик на возилото.
Вицепремиерот не демантираше дека го возел автомобилот, но рече дека не бил на негово име. А не станува збор и за какво било возило, туку за „ауди А6″ од 2021 година. Луксузно возило чија цена на ново, во моментов, почнува од околу 60 000 евра.
Во интервју за „Канал 5“ Груби тврдеше дека повеќе од три години нема лично приватно возило. Кога станал вицепремиер, добил службено возило (и тоа не едно), па увидел дека не го користи тогашното „ауди” што го поседувал и го продал за да не губи на вредноста.
Оттогаш, кога и да му треба возило за приватни потреби, Артан Груби позајмувал од свои блиски. Едно од тие возила, кои не се негови, но ги користел, било „ауди А6″ кое беше запалено пред неговиот дом.
Во интервјуто, Груби остави впечаток дека редовно е информиран за текот на истрагата и преземените дејствија и дека „се надева“ дека многу бргу ќе бидат пронајдени и сторителите и нарачателите.