Министерот за надворешни работи вели дека во Министерството има недостиг на кадри
Министерот за надворешни работи Бујар Османи, во врска со обвинувањата на ВМРО-ДПМНЕ за непотизам при вработувањата во МНР, уште еднаш повтори дека во Министерството што го раководи има недостиг на кадар.
Тој го коментираше и последниот случај за вработувањето на сопругата на пратеникот од СДСМ, Мартин Костовски, кој го обелодени ВМРО-ДПМНЕ.
„Нема ништо незаконито во вработувањето. Министерството има недостиг на кадар кој ќе се посвети на тешката работа во дипломатија. Нововработените започнуваат со минимална плата и треба години за да напредуваат во кариерата. Тоа е тешка професија, тие се некој вид номади кои цел живот го поминуваат на различни места. Госпоѓата Костовска е преземена од Куманово и сега е на пониска позиција одошто била претходно“,
рече министерот за надворешни работи Бујар Османи во Студио 10 на ТВ 24.
Османи кажа дека Костовска е на постдипломски студии по меѓународна политика во Прага и во нејзиниот случај не станува збор за трговија со влијание. Тој додава дека таа професија бара време за напредување и со оглед дека и критериумите се тешки, нема голем интерес за вработување во МНР.
Османи вели дека во моментов има оглас за вработување на 16 нови луѓе.
За случајот со Бесмира Ејупи, која наводно се подготвуваше за конзул, а сега е вработена во МНР, додека во меѓувреме од различни државни институции земала хонорари од 12 илјади евра, Османи ги повтори досега кажаните ставови дека таа е преземена од Министерството за политички систем и дека за тоа има одобрение од финансии.
„МНР има потреба од 50 вработувања но сега Министерството за финансии одобри 16. Секој млад човек кој знае јазици и сака да се посвети да конкурира. Ејупи е преземена од Министерството за политички систем, како што по закон се преземаат и други службеници“,
вели Османи за „Студио 10“.
Османи за Ејупи вели дека знае јазици и имала безбедносен сертификат од највисок ранг како член на службата на протокол во претходното министерство. Во однос на хонорарите што ги добивала, Османи рече дека треба да се праша и ВМРО-ДПМНЕ бидејќи била ангажирана од нивен градоначалник.
Антикорупциската комисија најави дека на следната седница ќе одлучува дали ќе отвори нов случај по информациите за вработувањето на Ејупи во МНР.
Антикорупциска поднесе иницијатива за кривична пријава за ангажманот на Ејупи во пет општини истовремено.