Османи вели дека Бесмира Ејупи сосема случајно се нашла во групата од 13 соработници кои преминале од Министерството за политички систем во МНР и дека не гледа никаков проблем зошто посоченото лице не би требало да се вработи во МНР
Министерот за надворешни работи Бујар Османи вели дека лицето Бесмира Ејупи не е директно вработена во МНР, туку таа е преземена од Министерството за политички систем со уште 12 други вработени.
„Лицето за кое толку многу се зборува во јавноста во МНР дојде од Министерството за политички систем и работи на најниска позиција како соработник за протокол. Тоа не се луѓе што влегуваат во МНР како дипломати, тие работат најниски административни работи и нема ништо спорно во тоа вработување. За да бидете назначени на таква позиција воопшто не ви ни треба си-ви. Такво нешто ви е потребно доколку напредувате од почетната позиција. Тоа лице не е советник затоа што за таа позиција треба да има 10-15 години работно искуство“,
рече министерот Османи одговарајќи на новинарско прашање.
На прашањето дали Бесмира Ејупи сосема случајно се нашла во групата од 13 соработници кои преминале од Министерството за политички систем во МНР, Османи рече дека е сосема случајно и дека не гледа никаков проблем зошто посоченото лице не би требало да се вработи во МНР.
“Не гледам ништо спорно во процесот. Кажете ми една работа којашто е спорна. Во МНР работат над 450 луѓе. Секој може да се вработи доколку ги исполнува условите за тоа. Некој треба да ми каже зошто да не биде вработена, па јас да кажам зошто треба да биде“,
рече министерот.
Османи ги отфрли шпекулациите дека личноста е кандидат за конзул.
„Веднаш по шпекулацијата дека ќе го заземе местото конзул, Ејупи била вработена во Општина Петровец, каде што градоначалникот доаѓа од опозицијата. Затоа не ми е јасна нивната позиција. Потоа Ејупи оди во Министерството за политички систем, па од скоро е преземена во МНР. Може само да кажам дека се додека сум јас министер лицето Бесмира Ејупи нема да биде конзул“,
појасни Османи.
Дел од соработниците, објасни Османи, од Министерството за политички систем беа преземани преку систематизацијата, односно преку К5 програмата, а дел преку директна спогодба.
Османи, исто така, додаде дека во Министерството за надворешни работи има оглас за вработување на уште 16 лица и повика секој граѓанин на С Македонија што сака да работи во МНР и ги исполнува условите да се пријави на огласот.