Македонското собрание, вели францускиот претседател, направи решителен избор за Европа
Гласањето за заклучоците за францускиот предлог во македонското Собранието, вечерва по поздрави и претседателот на Франција, Емануел Макрон. Франција, вели тој, ќе застане покрај Северна Македонија за време на првата меѓувладина конференција.
„Со суверено гласање денес за предлогот што го даде Франција пред крајот од нејзиното претседавање со Советот на Европската Унија, македонското Собрание повторно направи решителен избор за Европа. Франција ќе застане покрај Северна Македонија за време на првата меѓувладина конференција која ќе отвори историска етапа во нејзиниот процес на пристапување кон Унијата“,
вели Макрон во објава на Твитер.
En votant souverainement aujourd’hui en faveur de la proposition faite par la France au terme de sa Présidence du Conseil de l’Union européenne, le Parlement macédonien fait une fois de plus le choix résolu de l’Europe.
— Emmanuel Macron (@EmmanuelMacron) July 16, 2022
La France se tiendra aux côtés de la Macédoine du Nord lors de la première conférence intergouvernementale qui ouvrira une phase historique de son processus d’adhésion à l’Union.
— Emmanuel Macron (@EmmanuelMacron) July 16, 2022
Претходно се огласи и германскиот канцелар Олаф Шолц велејќи дека гласањето во парламентот го отвори патот за преговори и порача дека ги сакаат Северна Македонија и Албанија за членки во ЕУ.
Пораки стигнаа и од други претставници на меѓународната заедница. Поранешниот германски министер за Европа и актуелен пратеник и претседател на комисијата за надворешни работи во Бундестагот, Михаел Рот, во објава порача дека е горд на Македонците. Претходно пораки стигнаа и од Брисел и Вашингтон.
Претседателот на Европскиот совет, Шарл Мишел порача дека денешното гласање по поплочува патот за првата меѓувладина конференција веќе наредната недела, а со слична порача излезе и претседателката на ЕК, Урсула фон дер Лајен. Се овозможува, твитна таа, брзо отворање на преговорите. Според Лајен, ова била историска можност и Северна Македонија ја искористила.
И еврокомесарот за проширување, Оливер Вархеји, се огласи на социјалните мрежи. Се радуваме, рече тој, на отворањето на пристапните преговори во вторник, кога ќе се сретнеме во Брисел на првата меѓувладина конференција.
Со писмена изјава излезе и американскиот државен секретар Ентони Блинкен. Во изјавата тој наведе дека САД ги препознаваат тешките размени кои се направени со овој компромис, но кој ги признава и почитува културниот идентитет на Северна Македонија и македонскиот јазик. Одлуката на македонското Собрание, според него, дојде во критичен момент за Северна Македонија, Западен Балкан и Европа.