Шарл Мишел, Урсула фон дер Лајен, Оливер Вархеји го поздравивја денешното гласасње во парламентот и едногласно порачуваат дека со тоа се зацртал европскиот пат на земјата
Само десетина минути откако 68 пратеници се изјаснија „за“ за заклучоците за францускиот предлог стигнаа пораките од врвот на Европската Унија и Европската комисија.
„Денешното гласање во Собранието на Северна Македонија го поплочува патот за одржување на првата Меѓувладина конференција идната недела. Ова е суштински чекор на земјата и за ЕУ. Нашата иднина е заедничка и ве чекаме со отворени раце“,
напиша на Твитер Шарл Мишел, претседател на Европскиот совет.
Со слична порака излезе и претседателката на Европската комисија, Урсула фон дер Лајен.
„Честитки до Северна Македонија за гласањето со кое се овозможуваат условите за брзо отворање на пристапните преговори. Ова беше историска можност и вие ја искористивте“,
напиша Фон дер Лајен.
Еврокомесарот за проширување порача дека веќе во вторник се очекува одржувањето на Меѓувладината конференција.
„Го поздравувам гласањето по неколкудневна дискусија во парламентот со што на владата и се дава чист мандат за почеток на првата Меѓувладина конференција базирана на францускиот предлог. Се радуваме на отворањето на пристапните преговори во вторник кога ќе се сретнеме во Брисел за првата Меѓувладина конференција“,
напиша Оливер Вархеји на Твитер.
Наспроти честитиките од меѓународната заедница, претседателот на ВМРО-ДПМНЕ, Христијан Мицкоски, по завршувањето на гласањето во Собранието на прес-конференција со пратениците од неговата партија рече дека Договорот што Владата го прифатила е срам за целата држава и претставува предавство на националните и државни интереси.