„Народот може да биде спокоен. Ова не е 2019-та година.“, рече Мицкоски додавајќи дека гарант за тоа се изјавите на пратениците заверени на нотар дека нема да гласаат за уставните измени
Претседателот на ВМРО-ДПМНЕ, Христијан Мицкоски по завршувањето на гласањето во Собранието им се заблагодари на граѓаните кои во изминатиот период протестираа против францускиот предлог. Тој на прес-конференција со пратениците од пратеничката група на ВМРО-ДПМНЕ рече дека Договорот што Владата го прифатила е срам за целата држава, а самиот чин на прифаќање, како што рече, претставува предавство на националните и државни интереси.
„Ова е комплетирање на вториот дел од предавството започнато од Заев уште во јули-август 2017 година. Предавството сега коешто содржи план за бугаризација и асимилација на македонскиот народ ќе биде немирната совест со која ќе мора да живее секој пратеник и секој член на Владата кој го поддржа овој срамен документ“,
рече Мицкоски додавајќи дека пратениците на СДСМ ќе мора да го погледнат народот во очи откако сѐ ќе помине.
Според Мицкоски, власта сега била фокусирана на, како што вели, гола борба за фотелји.
„Кога ја предаваа Македонија не заборавија да крадат. Не заборавија на анексите, тендерите, договорите во четири очи, ама народот и коалицијата предводена од ВМРО-ДПМНЕ е тука да ги потсеќа за предавството, за трговиите, за ударот кон Македонија за кое ви ветувам народен македонски дека ќе дојде ден кога тие ќе одговараат. Тие се ставија на темната страна на историјата и тие наместо страната на народот, ја одбраа страната на предавството“,
вели Мицкоски.
Вели дека за тоа колку е гарантиран македонскиот јазик вчера кажала заменик-портпаролката на Европската комисија, Дана Спинан, која како што рече Мицкоски, ја надсинхронизирала претседателката на ЕК, Урсула фон дер Лајен. Според Мицкоски, сега бугарските асимилаторски барања за промена на учебниците стануваат услов за влез во ЕУ.
„И додека тие не се исполнат нема почеток на преговори, ниту напредок кон патот на Унијата. Само каков тежок дебакл е ова за дипломатијата и тимот на најнеспособните Маричиќ и Ковачевски. Тука не би го ставил Бујар Османи, затоа што тој има друга агенда. Иако му е полна устата за Македонија, тој одработуваше за други, туѓи интереси. Тие со ова се одрекуваат и поплукуваат на столетната борба на Илинденците, на Партизаните, газат врз гробовите на нашите херои, врз маката на нашиот народ“,
рече Мицкоски, додавајќи дека ова е трајна лузна за партијата СДСМ која од денеска станува, како што рече, чирак на големобугарската кауза.
Претседателот на ВМРО-ДПМНЕ вели дека сѐ уште ништо не е готово, а борбата продолжува и натаму. Порача дека избори мора да има и оти Информацијата која помина во Собранието нема никакво значење зашто рамката треба да ја усвои Владата. Повтори дека измените со кои Бугарите треба да влезат во Уставот нема да поминат во Собранието бидејќи за тоа гаранција било ВМРО-ДПМНЕ и коалицијата.
„Народот може да биде спокоен. Ова не е 2019-та година“, рече Мицкоски додавајќи дека гарант за тоа изјавите на пратениците заверени на нотар дека нема да гласаат за уставните измени.
рече Мицкоски додавајќи дека гарант за тоа се изјавите на пратениците заверени на нотар дека нема да гласаат за уставните измени.
Појасни дека сите пратеници, освен тие што во моментот се болни од ковид на нотар завериле изјави дека нема да прифатат промена на Уставот. Во спротивно, тие ќе си поднесат неотповиклива оставка.
Првиот човек на најголемата опозициска партија вели дека идната Влада предводена од ВМРО-ДПМНЕ ќе има многу тешка задача да го исправи тоа што сега го направила Владата на СДСМ.