Пратениците на ВМРО-ДПМНЕ наместо да им служат на оние од кои се избрани и платени му служат само на лидерот од белата палата, стои во писмената реакција од СДСМ во врска со блокадата на Собранието од страна на ВМРО-ДПМНЕ која почнува од денеска. Во реакцијата од партијата додаваат оти СДСМ остро ќе се спротивстави на овие блокади и ќе најде начин како да ги донесе законите во интерес на граѓаните. Оттаму додаваат дека ваквата, како што велат, антидржавна политика, себичност и негрижа ќе бидат повторно силно поразени уште на следните избори
Пратениците на ВМРО-ДПМНЕ кои бојкотираат и блокираат Собрание не смеат да бидат платени од граѓаните за својата неработа и деструктивно однесување, реагираат од СДСМ во врска со активната блокада на Собранието од страна на ВМРО-ДПМНЕ и коалицијата која започнува од денеска.
Во писмената реакција од СДСМ стои оти пратениците кои ќе ја бојкотираат и блокираат работата на парламентот треба итно да се откажат од сите привилегии, да ги донираат платите и да престанат да користат службени телефони, патувања и сè што им следува бидејќи, како што велат, тоа не го заслужуваат.
„Неодговорноста и партиската послушност кон лидерот Мицкоски ќе биде единствената работа по која ќе се памети овој пратенички состав на ВМРО-ДПМНЕ, но тоа не смее и не треба да го плаќаат граѓаните од свој џеб. Пратениците на ВМРО-ДПМНЕ наместо да им служат на оние од кои се избрани и платени му служат само на лидерот од белата палата“,
стои во реакцијата на СДСМ.
Во соопштението од партијата додаваат оти остро ќе се спротивстават на овие блокади и ќе најдат начин како да ги донесат законите во интерес на граѓаните и додаваат дека ваквата, како што велат, антидржавна политика, себичност и негрижа ќе бидат повторно силно поразени уште на следните избори.
Во меѓувреме, од ВМРО-ДПМНЕ истакнуваат дека премиерот Ковачевски имал доволно време да излезе од сенката на Заев и да го стави интересот на народот во прв план, но како што велат, не се осмелил.
„Државата сè повеќе тоне. Вчера ДЗС излезе со официјален податок и констатираше двоцифрена инфлација. За една година цените на основните производи се зголемени од 10 проценти до 50 проценти. Народот плаќа 30 отсто поскапа струја и 15 отсто поскапо парно. И секој ден има сè повеќе проблеми. Ковачевски не е нов во политиката, тој беше и заменик министер за финансии. Тој е дел од проблемите и не може да биде решение“,
стои во реакцијата од опозициската ВМРО-ДПМНЕ.
Токму затоа, додаваат од партијата, потребни се предвремени парламентарни избори, а активната блокада е одговор на игнорирањето на власта.