Воедно, посочува Маричиќ, со овој историски чин конечно се исправа долгата неправда врз МПЦ-ОА и македонскиот народ, а со признавањето на каноничноста од страна на мајката црква, првопрестолната Вселенската патријаршија става радосен крај на речиси седумдесетгодишната изолација на возобновената Охридска архиепископија
Вицепремиерот за европски прашања Бојан Маричиќ синоќа на својот официјален фејсбук-профил го честита признавањето на МПЦ-Охридска архиепископија од страна на Вселенската патријаршија и се заблагодари на истрајноста, вербата и надежта на Светиот архиерејски синод на Македонската православна црква ‒ Охридска архиепископија, на свештенството, монаштвото и верниот народ.
„Со денешното исконско признавање од страна на Вселенската патријаршија, МПЦ-Охридска архиепископија станува неискоренлив дел во евхаристиското општење со својата јерархија, клирот и народот, под пазувите на единството на православието“,
стои во синоќешната објава на Маричиќ на Фејсбук.
Воедно, пишува Маричиќ, со овој историски чин конечно се исправа долгата неправда врз МПЦ-ОА и македонскиот народ, а со признавањето на каноничноста од страна на мајката црква, првопрестолната Вселенската патријаршија става радосен крај на речиси седумдесетгодишната изолација на возобновената Охридска архиепископија.
„Топло и со радост сакам да се заблагодарам на истрајноста, вербата, надежта и молитвите на Светиот архиерејски синод на Македонската православна црква-Охридска архиепископија на свештенството, монаштвото и верниот народ“,
стои во честитката на вицепремиерот Маричиќ.
Со вчерашната одлука на Светиот синод на Вселенската патријаршија, возглавен од Неговата Сесветост, патријархот вселенски г. г. Вартоломеј, се отстранува повеќедецениската шизма наложена врз нашата древна Охридска архиепископија, возобновена во лицето на МПЦ. Тоа значи дека Вселенската патријаршија ја признава црковната јерархија предводена од архиепископот Стефан за канонска и валидна во сеправославниот свет и воспоставува канонско и литургиско општење со неа.
По одлуката на Вселенската патријаршија да ја признае Охридската архиепископија како канонска црква, пак, со негативна реакција се јави Руската православна црква (РПЦ) која вели дека ги признава исклучиво правата на Српската православна црква (СПЦ) во Северна Македонија.