ВМРО-ДПМНЕ ѝ одбројува на власта до 10 мај, вторник, да се согласи на лидерска средба на која ќе биде договорен датум за предвремени избори, а ако тоа не се случи – почнува, како што беше соопштено, ќе почне активна блокада на Собранието
СДСМ има план како да се спротивстави на блокадите на ВМРО-ДПМНЕ, велат од најголемата владејачка партија, откако опозицијата побара лидерска средба, за која доколку не се одржи најавија активна блокада на Собранието. Од СДСМ велат дека нема да дозволат опозицијата заради лични и партиски интереси да ја држат државата во заложништво.
„Бесрамните најави на Мицкоски за засилени блокади е најнеодговорно однесување во време на најголемата економска и енергетска криза после Втората светска војна, кога Собранието треба да носи брзи и ефикасни решенија за граѓаните. СДСМ, парламентарното мнозинство, досега наоѓале начин за надминување на блокадите, така ќе биде и сега. Имаме план како да се справиме со блокадите и потребните законски измени да бидат донесени во интерес на граѓаните и државата“,
се вели во реакцијата.
Од ВМРО-ДПМНЕ пак тврдат дека подаваат рака во интерес на граѓаните и државата.
„Бараме СДСМ да се вразумат и да прифатат да се договори датум за предвремени парламентарни избори, а до тогаш да вклучат тимови од експерти да помогнат во изнаоѓањето на решенија за кризите и проблемите кои им тежат на граѓаните. СДСМ треба да покажат доблест и интересите на граѓаните да ги стават пред нивните тесни партиски интереси и желбата за гола власт.“,
велат од ВМРО-ДПМНЕ.
ВМРО-ДПМНЕ ѝ одбројува на власта до 10 мај, вторник, да се согласи на лидерска средба на која ќе биде договорен датум за предвремени избори, а ако тоа не се случи – почнува, како што беше соопштено, активна блокада на Собранието.
Потпретседателот на ВМРО-ДПМНЕ и пратеник во Собранието, Александар Николоски, во гостување во емисијата „360 степени“, зборувајќи за тоа како точно е дефинирано барањето на неговата партија за лидерска средба, рече дека на самата средба би се изложиле точки од интерес на на двете страни – ВМРО-ДПМНЕ, но и СДСМ.
Премиерот Димитар Ковачевски, пак, изјави дека не прифаќа лидерска средба само за датум за избори. Тој ја отфрла идејата за предвремени парламентарни избори и оценува дека опозицијата се плаши од редовни избори, бидејќи нивните избрани градоначалници не ја оправдуваат довербата на граѓаните.
*ПОВРЗАНА ВЕСТ: (ВИДЕО) Ново издание на 360°: Интервју со Александар Николоски за најавената активна блокада на Собранието