Функционерот од ДУИ не гледа ништо спорно во вчерашниот настан и тврди дека за подигање на споменикот се запазени сите формални процедури
Министерот за надворешни работи Бујар Османи од редовите на ДУИ смета дека вчерашното откривање на споменикот на ОНА во селото Слупчане не било партиска активност, туку општинска и за негово подигање тврди дека се запазени сите процедури.
„Не мислам дека тоа вчера беше партиска активност, тоа беше активност на Општина Липково која според моите информации ги има запазено сите формални процедури за изградба на споменик во Општината. Со одлука на Советот, со сите понатамошни одлуки за споменик кој е во рамки на локалната власт и ние бевме поканети како гости од страна на градоначалникот и не гледам ништо спорно во тој дел“,
изјави денеска Османи одговарајќи на новинарско прашање.
На вчерашниот настан присуствуваа функционери од ДУИ, како и партискиот лидер Али Ахмети.

Во говорот на церемонијата вчера Ахмети порача дека ОНА е составен дел од историјата на нашата земја, без која не би можел да се постигне Охридскиот рамковен договор.
Овој споменик е изграден за 200 000 евра, а негово подигнување изминативе денови беше честа тема во јавноста.
Министерството за транспорт и врски, наспроти тврдењата на локалните власти, негираше дека била побарана дозвола од нив, додека од Министерството за култура се оградија наведувајќи дека надлежноста според Законот за меморијални споменици и спомен-обележја, надлежни се Собранието или единиците за локална самоуправа.
*Поврзани вести:
- Во Слупчане церемонија за откривање на споменикот во чест на борците на ОНА
- Ахмети од Слупчане: Оваа земја не може да има историја без ОНА
- Овој споменик не е за поделба, туку за обединување – мора така да се доживува од сите граѓани, вели Груби за споменикот во чест на ОНА
- Да не се крева непотребна меѓуетничка тензија поради новиот споменик на УЧК, порача Стојанче Ангелов
- Липково чекаше фабрика, а доби уште едно замајување – споменик и лага на ДУИ, реагира ВМРО-ДПМНЕ