„Досега, владејачкото мнозинство секогаш ѝ нудеше на опозицијата потпретседателски позиции, различни опозициски групи соодветно одлучуваа дали ќе има пет или шест потпретседатели, најчесто така беше, но за ова треба да се разговара пред конститутивната седница“, вели претседателката на српскиот парламент во технички мандат и вршител на должноста претседател на државата
Претседателката на српскиот парламент во технички мандат и вршител на должноста претседател на државата, Ана Брнабиќ, тврди дека никој што ја претставува Студентската листа не ги известил актуелните парламентарни служби за започнување дијалог за првата конститутивна седница на Парламентот најавена за 17 ноември.
„Досега, владејачкото мнозинство секогаш ѝ нудеше на опозицијата потпретседателски позиции, различни опозициски групи соодветно одлучуваа дали ќе има пет или шест потпретседатели, најчесто така беше, но за ова треба да се разговара пред конститутивната седница“,
ја пренесува „Н1“ изјавата на Брнабиќ во емисијата „Хит Твит“ на ТВ Пинк.
Таа вели дека овие разговори се одржувале кратко по изборите и додаде дека од 2012 година, кога победи Српската напредна партија, практика е секогаш прво да ѝ се понуди на опозицијата да каже дали е заинтересирана да води некои парламентарни комисии.
„Опозицијата ги водеше некои од најважните комисии, надворешни работи, европски интеграции и така натаму. Но, сето ова секогаш се случуваше во дијалогот пред првата конститутивна седница. Ова е прв пат никој од Студентската листа да не се обиде да стапи во контакт со службите или да разговара со мене“,
рече Брнабиќ.
Таа ги повика претставниците на Студентската листа да го сторат тоа во текот на следната недела, во согласност со најдобрите демократски практики, со цел да се подготват за конституирање на Собранието.
Претходно вчера, Брнабиќ на прес-конференција рече дека конститутивната седница на Собранието ќе се одржи во вторник, 17 ноември, во 10 часот наутро.
Таа изјави дека дневниот ред на конститутивната седница има шест точки – потврдување на мандатот на пратениците, избор на претседател и потпретседател на Народното собрание, назначување на генерален секретар, избор на членови на парламентарните работни тела и постојани парламентарни делегации во меѓународни институции.
Брнабиќ, исто така, рече дека очекува новото свикување на парламентот да биде место за сериозно политичко донесување одлуки и отворена дискусија. Таа особено го нагласи значењето на телевизиските преноси на парламентарните седници.
Студентите во блокадата, кои победија на вонредните парламентарни избори и освоија 140 пратенички мандати со Студентската листа, објавија дека се подготвени за конститутивната седница на Српскиот парламент закажана за 17 ноември.
„Констутитивна седница на Народното собрание на 17 ноември. Подготвени сме“,
напишаа кратко студентите на својот профил на социјалните мрежи.