Тој во своето вечерно обраќање до украинскиот народ истакна дека во интерес на Киев е да има отворена и транспарентна истрага за наводните масовни убиства на цивили во Буча и изрази уверување оти ќе се откријат уште полоши случаи на масовни убиства на цивили извршени од руските воени сили
Украинскиот претседател Володимир Зеленски изјави оти денеска ќе има обраќање на итниот состанок пред Советот на безбедност на Обединетите нации.
Тој во своето вечерно обраќање до украинскиот народ истакна дека во интерес на Киев е да има отворена и транспарентна истрага за наводните масовни убиства на цивили во Буча и изрази уверување оти ќе се откријат уште полоши случаи на масовни убиства на цивили извршени од руските воени сили.
„Би сакал да нагласам дека сме заинтересирани за најкомплетна, најтранспарентна истрага, чии резултати ќе бидат познати и објаснети на целата меѓународна заедница“,
рече Зеленски, а пренесува Би-би-си.
На денешната седница на Советот за безбедност ќе се разговара за украинските наводи за убиства на цивили извршени од руски војници во Буча, северозападно од Киев.
Западните лидери, вклучително и американскиот државен секретар Ентони Блинкен и францускиот претседател Емануел Макрон, повикаа на истраги за воени злосторства и зголемување на санкциите кон Русија. Претседателот на Советот на ЕУ, Шарл Мишел, вети дополнителни санкции за Русија, додека генералниот секретар на Обединетите нации, Антонио Гутереш, рече дека независната истрага за убиените цивили во Буча е „суштинска“. Генералниот секретар на НАТО, Јенс Столтенберг, оцени дека сликите покажуваат бруталност кон цивилите, каква што не е видена во Европа со децении.
Русија, пак, категорично ги отфрли тие обвинувања нарекувајќи ги „криминални провокации“ и најави дека ќе достави „конкретни докази“ до Советот за безбедност оти нејзините сили не биле вклучени во злосторствата врз цивилите.